Ashok Gahlot Slams Modi Government حکومت راہل کے سوالوں کا جواب دے نہ کہ سازش رچے،اشوک گہلوت

راجستھان کے وزیر اعلی اشوک گہلوت نے کہا کہ راہل گاندھی کو پارلیمنٹ سے باہر کیا گیا اور اس پر حزب اختلاف کے رہنماؤں کا سخت ردعمل آیا۔ انہوں نے مزید کہا کہ کوئی نہیں جانتا کہ ملک کس سمت جا رہا ہے۔ جمہوریت خطرے میں ہے۔

ریاست راجستھان کے شہر اجمیر میں واقع جواہر اسکول کے احاطہ میں کانگریس پارٹی کی ڈویژنل سطح کی ورکرز کانفرنس کا انعقاد کیا گیا۔اس کانفرنس میں موجود لوگوں سے وزیر اعلی اشوک گہلوت، راجستھان کے ریاستی انچارج سکھجندر سنگھ رندھاوا، پی سی سی کے سربراہ گووند سنگھ دوتاسارا نے خطاب کیا۔کانفرنس کے دوران ہی زوردار بارش شروع ہوگئی،کانفرنس میں موجود کارکنان بارش سے بچنے کے لئے کارکنان ہورڈنگز، بینرز اور کرسیوں کا سہارا لیا۔

کانگریس پارٹی کی یہ کانفرنس تقریباً آدھے گھنٹے تک جاری رہی۔ریاست کے وزیر اعلی اشوک گہلوت کا پارٹی کے سینیئر رہنماؤں اور پارٹی کے کارکنان نے استقبال کیا۔کانفرنس کے لئے بنائے گئے اسٹیج پر جیسے وزیر اعلی اشوک گہلوت سمیت دیگر رہنما پہونچے، اچا نک تیز بارش شروع ہوگئی۔بارش سے بچنے کے لئے کارکنان کرسی،ہورڈنگ وغیرہ کا سہارا لینے پر مجبور ہوئے۔ موسلا دھار بارش نے کانگریس ورکرس کانفرنس کے منتظمین کے انتظامات کو بے نقاب کردیا۔

اس دوران صحافیوں سے بات کرتے ہوئے وزیر اعلیٰ اشوک گہلوت نے کہا کہ راہل گاندھی کو پارلیمنٹ سے باہر کیا گیا اور اس پر حزب اختلاف کے رہنماؤں کا سخت ردعمل آیا۔ انہوں نے مزید کہا کہ کوئی نہیں جانتا کہ ملک کس سمت جا رہا ہے۔ جمہوریت خطرے میں ہے۔ راہل نے اڈانی کا مسئلہ اٹھایا، بی جے پی کو اس مسئلہ پر جواب دینا چاہئے لیکن انہوں نے سازش کا سہارا لیا۔انہوں نے مزیدکہا کہ ملک میں تشویشناک صورتحال ہے اور ملک خطرناک دور سے گزر رہا ہے، جو درست نہیں۔ امرت پال کے خالصتان بنانے کے بیان پر انہوں نے کہا کہ ملک میں ایسے بیانات دینے کی ہمت کیسے ہو رہی ہے۔
ہندو راشٹر کے بعد خالصتان بنانے کا بیان ملک کے لیے باعث تشویش ہے۔