جے پور میں جلوس غوثیہ نکالا گیا

جے پور میں گیارہویں شریف کے موقع پر جلوس غوثیہ نکالا گیا۔ جلوس میں شامل تمام لوگوں نے اپنے ہاتھوں میں اسلامی پرچم لے رکھا تھا۔ جلوس کے دوران کورونا گائیڈ لائن کا خاص خیال رکھا گیا۔

راجستھان میں آج گیارہویں شریف عقیدت و احترام کے ساتھ منایا جا رہا ہے۔ جے پور میں اس موقع پر جلوس غوثیہ بھی نکالا گیا۔ یہ جلوس غوثیہ جے پور کے دہلی روڈ علاقے میں واقع مسجد غوثیہ سے روانہ ہوا اور الگ الگ راستوں سے ہوتا ہوا تالا گاؤں پہنچا۔

جلوس میں شامل تمام لوگوں نے اپنے ہاتھوں میں اسلامک پرچم لے رکھا تھا۔ وہیں غوثیہ مسجد کے باہر علمائے کرام کی جانب سے حضرت سیدنا غوث اعظم رضی اللہ تعالی عنہ کی زندگی پر روشنی بھی ڈالی گئی۔ تالا گاؤں میں فاتحہ خوانی کا بھی اہتمام کیا گیا۔ اس دوران عالمی وبا کورونا وائرس کے خاتمے کی دعا بھی کی گئی۔

اس موقع پر جلوس کمیٹی کے عہدے داران نے بتایا کہ حضور سیدنا غوث اعظم رضی اللہ تعالی عنہ کی گیارہوی شریف کے مبارک موقع پر ہر سال جلوس نکالا جاتا ہے۔ لیکن کورونا وبا کی وجہ سے دو برس بعد یہ جلوس نکالا گیا۔

انہوں نے بتایا کہ اس مرتبہ کورونا کا قہر کم ہونے کی وجہ سے گائیڈ لائن کے مطابق جلوس غوثیہ نکالا گیا۔