گہلوت نے نیک خواہشات کے لیے ریاست کے لوگوں کا شکریہ ادا کیا

اسپتال سے چھٹی ملنے کے بعد آج وزیر اعلیٰ نے ریاست کے لوگوں کا شکریہ ادا کیا اور کہا کہ 'راجستھان کے لوگوں نے ہمیشہ مجھے پیار اور آشیرواد دیا ہے۔ یہ میری زندگی کا سرمایہ ہے‘‘۔

جے پور: راجستھان کے وزیر اعلیٰ اشوک گہلوت نے ان کی صحت یابی کے لیے پیش کی گئی نیک خواہشات کے لیے ریاست کے لوگوں کا شکریہ ادا کیا ہے۔

گہلوت نے اینجیو پلاسٹی کے بعد اتوار کو اسپتال سے چھٹی ملنے کے بعد آج ریاست کے لوگوں کا شکریہ ادا کرتے ہوئے کہا’’ میری صحتیابی کے لیے پیش کی گئی نیک خواہشات کے لئے میں ریاست کے باشندوں کا بے حد مشکور ہوں۔ راجستھان کے لوگوں نے ہمیشہ مجھے بہت پیار اور آشیرواد دیا ہے۔ یہ میری زندگی کا سرمایہ ہے‘‘۔

انہوں نے کہا ’’آپ کی نیک تمناؤں سے اب میری صحت بہتر ہو رہی ہے، پہلے سے بہتر محسوس کر رہا ہوں اور کچھ دنوں تک ڈاکٹروں کی نگرانی میں رہوں گا اور جلد ہی میں مکمل صحت یاب ہو کر پہلے کی طرح ریاست کی خدمت کروں گا‘‘۔

وزیراعلیٰ نے کہا ’’یہ پوسٹ کووڈ کے اثر کی وجہ سے ہوا ہے، اس لئے آپ سے بھی میری اپیل ہے کہ آپ اپنا خیال رکھیں ، صحت مند رہیں، کووڈ پروٹوکول پر عمل کریں اور ویکسین ضرور لگوائیں‘‘۔