راجستھان: محمد اظہرالدین کار حادثہ میں بال بال بچے

بھارتی کرکٹ ٹیم کے سابق کپتان محمد اظہرالدین کی کار راجستھان میں حادثہ کا شکار ہوگیا اس دوران وہ بال بال بچ گئے، جبکہ ان کی کار کو شدید نقصان پہنچا ہے۔

کرکٹ ٹیم کے سابق کپتان اور کانگریس پارٹی کے رہنما محمد اظہر الدین کی کار راجستھان کے سوروال میں ایک حادثہ کا شکار ہوگئی۔ سابق کپتان بال بال بچ گئے۔ جبکہ ان کی کار کو زبردست نقصان پہنچا ہے۔

اطلاعات کے مطابق بھارتی ٹیم کے سابق کپتان سوئی مادھوپور ضلع کے رنتھمبور میں واقع نیشنل پارک جارہے تھے کہ حادثہ پیش آگیا۔ یہ حادثہ لالسوٹ کوٹہ ہائی وے پر پیش آیا۔ حادثہ کے وقت کار میں اظہرالدین کے علاوہ دیگر تین افراد سوار تھے۔

حادثہ کے بعد مقامی لوگوں نے اظہرالدین کو دیکھ کر حیرت زدہ رہ گئے جبکہ انہیں دوسری کار کے ذریعہ ہوٹل پہنچایا گیا۔

سوروال پولیس کے مطابق اظہرالدین کی کار بے قابو ہوکر الٹ گئی اور سڑک کنارہ واقع کھیت میں جاگری۔ اس دوران ایک شخص زخمی ہوگیا جس کا قریب میں واقع ہسپتال میں علاج کیا جارہا ہے۔