اسمبلی انتخابات میں پہلی بار ووٹرز کو کیو آر کوڈ والی پرچیاں دی جارہی ہیں

ریاست راجستھان میں 25 نومبر کو اسمبلی انتخابات کے لئے ووٹنگ ہوگی۔ جس کے پیش نظر الیکشن کمیشن کی تمام تیاریاں جاری ہیں۔ وہیں دوسری جانب سیاسی پارٹیوں کی سرگرمیاں عروج پر ہیں۔ Assembly election on 25th Nov in Rajasthan

جے پور: راجستھان میں 25 نومبر کو ہونے والے اسمبلی انتخابات 2023 کے لیے ووٹنگ فیصد بڑھانے اور رائے دہندوں کی سہولت کے لیے پہلی بار تصویروں والی سلپس کے بجائے کیو آر کوڈ والی سلپس دی جارہی ہیں، جسے اسکین کرنے کے بعد پولنگ اسٹیشن اور اسمبلی حلقہ کی معلومات مل جائے گی۔

ریاست کے چیف الیکٹورل آفیسر پروین گپتا نے بتایا کیو آر کوڈ والی ووٹر انفارمیشن سلپس اور ووٹر گائیڈ کی 16 نومبر سے تقسیم شروع کردی گئی تھی اور پہلی بار ریاست کے تمام ووٹروں کو کیو آر کوڈ والی ووٹر انفارمیشن سلپس تقسیم کی جا رہی ہیں۔ کیو آر کوڈ والی ووٹر انفارمیشن سلپ کے ذریعے ووٹر اپنے پولنگ اسٹیشن کا نمبر، ریاست اور ضلع کا ہیلپ لائن نمبر جیسی اہم معلومات حاصل کر سکیں گے۔

الیکشن ڈیپارٹمنٹ کی جانب سے پہلی بار یہ سہولت شروع کی گئی ہے۔ ریاست میں پیر تک کیو آرکوڈ والی ووٹر سلپ اورووٹر گائیڈز کی 92 فیصد تقسیم مکمل ہو چکی ہے۔ گپتا نے کہا کہ کیو آرکوڈ والی ووٹر سلپ کے ساتھ ہی ہر خاندان کے لیے ووٹر گائیڈ بھی ووٹروں کے گھر گھر پہنچائی جا رہی ہے۔ اس کے لیے ہر اسمبلی حلقہ میں بی ایل او کے ذریعے ووٹر گائیڈ تقسیم کرنے کا کام 91.3 فیصد مکمل ہو چکا ہے۔

محکمہ الیکشن کی ہدایات پر اسمبلی حلقوں میں بنائے گئے بی ایل اوز اپنے اپنے علاقوں میں ووٹرز کے گھرگھر پہنچ کر ووٹنگ گائیڈ پیش کر رہے ہیں اور ووٹنگ سلپس بھی دے رہے ہیں۔ یہ 16 صفحات پر مشتمل کتابچہ ہر خاندان کو دیا جا رہا ہے۔ اس میں ووٹنگ کے عمل سے متعلق تمام معلومات دی گئی ہیں تاکہ ووٹر جب پولنگ اسٹیشن جائے تو اسے کسی قسم کی پریشانی کا سامنا نہ کرنا پڑے۔ اس میں ووٹر لسٹ میں آپ کا نام تلاش کرنے، ووٹ ڈالنے کے لیے ووٹر شناختی کارڈ یا 12 شناختی کارڈوں میں سے کوئی ایک، ووٹنگ کے عمل وغیرہ کے بارے میں معلومات دی گئی ہیں۔

یو این آئی