اجمیر سے عقیدت مند اب کربلا کی زیارت کو جاسکیں گے

Devotees from Ajmer will now be able to visit Karbala: کربلا کی زیارت کے لیے اجمیر کے نوجوانوں کا ایک نیا اقدام سامنے آیا ہے۔ درگاہ اجمیر میں 200 روپے کے ٹکٹ پر زیارت کے لیے جانے کا موقع اور عقیدت مندوں کو قرعہ کے انداز میں کربلا کی زیارت کا خراج پیش کرنا موضوع بن گیا ہے۔

اجمیر:"مجھے یقین ہے کہ ایک دن ایسا بھی آئے گا۔ میرا حسین مجھے کربلا بلائے گا" کربلا کا سفر امت رسول اللہ کی آرزو ہے۔ ایسے میں اب اجمیر شریف کے مسلمان نوجوانوں نے ایک نیا اقدام شروع کیا ہے اور عاشقان اہل بیت کو کربلا کی زیارت پر بھیجنے کی ذمہ داری اٹھائی ہے۔ اس اقدام کا آغاز صوفی حضرت خواجہ غریب نواز رحمۃ اللہ علیہ کے مزار پر ایک محفل منعقد کرکے کیا گیا۔ جہاں ممبئی اور اجمیر کے دو عقیدت مندوں کو کربلا شریف بھیجنے کے لیے 2 لاکھ 20 ہزار روپے بطور اخراجات پیش کیے گئے۔ خاص بات یہ ہے کہ اس سفر کے لیے ہر شخص نے 200 روپے کا کوپن خریدا تھا اور پھر ان تمام کوپنوں کو جمع کرکے قرعہ اندزی کی گئی ہے۔ جس میں ممبئی کے ماجد خان اور اجمیر کے حاجی سید استخار چشتی کے نام سامنے آئے۔ ان دونوں کو 2 لاکھ 20 ہزار روپے کا انعام دیا گیا۔ درگاہ کے احاطہ نور میں کمیٹی ممبران نے ماجد خان اور افتخار چشتی کو پھولوں سے گل پوشی کرکے خوش آمدید کہا اور آخر میں ان کی سلامتی اور خوشیوں کے لیے دعائیں مانگی گئیں۔

واضح رہے کہ کچھ روز قبل راجستھان میں واقع اجمیر درگاہ سے وابستہ خادموں کی تنظیم انجمن یادگار شیخ زادگان کے لیے انتخابی پروگرام تیس دنوں کے اندر اعلان کرنے کا کورٹ نے حکم دیا تھا۔ اطلاع کے مطابق سول جج (مغربی) مکیش کمار مینا نے انجمن یادگار سے وابستہ اراکین کی عرضی نمٹاتے ہوئے مذکورہ حکم دیا تھا۔ بتایا جا رہا تھا کہ عدالتی حکم میں 30 دن کے اندر انتخاب کی تاریخ کا اعلان کیا جائے اور نتائج کے اعلان تک بجلی، پانی کے بل، قانونی اخراجات اور معذوروں، بزرگوں اور طلباء کی مدد کے علاوہ کوئی دوسرا خرچہ نہ کیا جائے۔ قابل ذکر ہے کہ موجودہ کمیٹی کو قواعد کے مطابق انتخاب کرانا تھا لیکن وہ وقت پر ایسا نہیں کر سکے۔