راجستھان میں پولیس افسر کی چار سالہ بچی کے ساتھ جنسی زیادتی، ملزم سروس سے برطرف

راجستھان کے دوسہ میں ایک پولیس افسر نے چار سالہ معصوم بچی کے ساتھ جنسی زیادتی جیسی گھناؤنی وردات کو انجام دیا۔ اس معاملے پر زبردست ہنگامے کے بعد ملزم ایس آئی کو پولیس سروس سے برخاست کر دیا گیا ہے۔ ڈی جی پی اومیش مشرا کی ہدایت پر جے پور رینج کے آئی جی امیش چند دتہ نے ملزم افسر کو خدمات سے برطرف کر دیا۔ Dausa Rape Case

جے پور: راجستھان کے دوسہ میں چار سالہ معصوم بچی کے ساتھ زیادتی کے ملزم سب انسپکٹر (ایس آئی) کو پولیس سروس سے برطرف کر دیا گیا ہے۔ اس واقعے کی اطلاع ملتے ہی ڈی جی پی اومیش مشرا نے اس پر سخت کارروائی کرنے کی ہدایت دی تھی۔ اس کے بعد جے پور رینج کے آئی جی امیش چند دتہ نے ملزم ایس آئی بھوپیندر سنگھ کو ہفتہ کی رات پولیس سروس سے برطرف کرنے کے احکامات جاری کر دیے۔

دراصل، یہ معاملہ جمعہ کو دوسہ میں سامنے آیا، جہاں 54 سالہ ایس آئی بھوپیندر سنگھ نے چار سال کی معصوم بچی کے ساتھ جنسی زیادتی کی۔ واقعے کی خبر پھیلنے کے بعد مقامی لوگوں نے زبردست ہنگامہ کیا۔ اس واقعے کے بعد ملزم بھوپیندر سنگھ نے خود کو تھانے کے ایک کمرے میں بند کر لیا تھا۔ مشتعل لوگوں نے تھانے کا گھیراؤ کیا، ملزم کو گھسیٹ کر باہر چوراہے پر لے گئے اور اس کی خوب پٹائی کی۔

دراصل جب لڑکی کے والد جب اس گھناؤنی واردات کی کی شکایت کرنے پولیس اسٹیشن گئے تو وہاں کچھ لوگوں نے ان کی پٹائی کی۔ اس دوران ان کا ہاتھ بھی ٹوٹ گیا۔ اس سے ناراض لوگوں نے تھانے کا گھیراؤ کیا اور زبردست مظاہرہ کیا۔ دوسہ ایس پی وندیتا رانا کے مطابق اس واقعہ کی اطلاع ملنے کے بعد فوری کارروائی کرتے ہوئے ملزم ایس آئی بھوپیندر سنگھ کو گرفتار کر لیا گیا۔ دفعہ 164 کے تحت متاثرہ بچی کا بیان بھی ریکارڈ کر لیا گیا ہے۔ بتایا جا رہا ہے کہ بچی کی حالت خطرے سے باہر ہے۔ اب اس معاملے کے ملزم ایس آئی بھوپیندر سنگھ کو پولیس سروس سے برخاست کر دیا گیا ہے۔