باڑمیر:راجستھان کے باڑمیر ضلع میں جمعرات کو ایک شخص نے ایک خاتون کی عصمت دری کر کے اسے زندہ جلا دیا۔ عصمت دری کی شکار خاتون کی جمعہ کی رات دیر گئے جودھ پور کے ایک سرکاری اسپتال میں علاج کے دوران موت ہوگئی۔ خاتون کی موت کے بعد مشتعل لوگ مہاتما گاندھی اسپتال کے احاطے میں جمع ہوگئے اور ایک کروڑ معاوضہ، سرکاری نوکری اور دیگر کا مطالبہ کررہے ہیں۔ انہوں نے خاتون کی لاش کا پوسٹ مارٹم کرانے سے بھی انکار کر دیا ہے۔دوسری طرف بی جے پی نے اس واقعہ پر اشوک گہلوت حکومت کو گھیر لیا ہے۔ مرکزی وزیر مملکت برائے زراعت کیلاش چودھری مہاتما گاندھی اسپتال پہنچے۔ انہوں نے اس واقعہ کو لو جہاد کی مثال قرار دیا ہے۔
انہوں نے کہا کہ ریاست میں امن و امان کی خراب صورتحال کی وجہ سے ایسے لوگ کھلے عام اس طرح کے واقعات کو انجام دے رہے ہیں۔ وزیر کے سامنے متاثرہ کے رشتہ داروں نے پچ پدرا کے ڈپٹی سپرنٹنڈنٹ آف پولیس مدن لال پر الزام لگایا کہ اس نے اس واقعہ کے بعد ان پر مسلسل دباؤ ڈالا۔ ان کی زمینوں کے کاغذات تھانے لے گئے اور انہیں تھانے میں بٹھا بھی دیا گیا۔ سوسائٹی کے لوگ جمع ہوئے تو مقدمہ درج کر لیا گیا۔
اسپتال کے باہر احتجاج کرنے والے لوگوں نے ایک کروڑ روپے معاوضہ، سرکاری نوکری اور پولیس افسران کے خلاف کارروائی کا مطالبہ کیا ہے۔ مطالبہ پورانا ہونے پر لوگوں نے احتجاج سے اٹھنے سے انکار کر دیا ہے۔ وزیر چودھری نے الزام لگایا کہ ایسے میں بھی پولیس افسران سیاست کریں گے۔ گہلوت حکومت پر سوال اٹھاتے ہوئے اپوزیشن لیڈر راجندر راٹھور نے ٹویٹ کیا اور لکھا کہ بلوترا، باڑمیر میں ایک خاتون کے ساتھ عصمت دری کے بعد جلانے کا واقعہ گہلوت کے جنگل راج کی عکاسی کرتا ہے۔ چیف منسٹر اشوک گہلوت، جو راجستھان کے محکمہ داخلہ کے سربراہ بھی ہیں، ریاست میں امن و امان کی خراب صورتحال کے لئے پوری طرح ذمہ دار ہیں۔