راجستھان میں مسلماںوں کے مسائل کو حل نہیں کیا جا رہا ہے: مجاہد علی نقوی

سماجی کارکن مجاہد علی نقوی نے کہا کہ مسلمان کانگریس کی حمایت کرتا ہے تو امید بھی رکھتا ہے کہ مسلمانوں کے مسائل کو حل کیا جائے گا۔ لیکن کانگریس نظرانداز کر رہی ہے۔ ساتھ ہی انہوں نے کانگریس سے مطالبہ کیا کہ جس کی جتنی ساجھیداری، اس کی اتنی حصہ داری۔

ای ٹی وی بھارت سے بات کرتے ہوئے سماجی کارکن مجاہد علی نقوی نے کہا کہ مسلمان نوجوان اب یہ سوچنے لگا ہے کہ اگر ہم کانگریس کی حمایت کرتے ہیں تو ہم ان سے توقع بھی رکھتے ہیں۔ لیکن کانگریس ایسا کرنے میں کامیاب نہیں ہوئی۔

مجاہد نے کہا کہ موجودہ وقت کی بات کی جائے تو ابھی حال ہی میں جےپور ہیریٹیج میونسپل کارپوریشن کا انتخاب مکمل ہوئے تھے، زیادہ تر مسلموں نے کانگریس کو حمایت دی تھی، لیکن مسلمانوں کو ہی نظرانداز کرتے ہوئے مسلم میئر نہیں بنایا گیا۔ ایسے میں مسلمانوں نے دیکھا کہ کانگریس ہم لوگوں کو نظر انداز کر رہی ہے۔

انہوں نے کہا کہ مسلمان کانگریس کو ووٹ دیتا ہے اور اپنی پریشانیوں کا حل چاہتا ہے، لیکن کانگریس حکومت کے اس دور میں بھی مسلمانوں کی پریشانیوں کا حل نہیں کیا جا رہا۔

اسد الدین اویسی کی پارٹی اے آئی ایم آئی ایم کے سوال پر انہوں نے کہا کی بھارت کے آئین نے ہر کسی کو الیکشن لڑنے کی آزادی دے رکھی ہے، ایسے میں اگر وہ اویسی صاحب بھی یہاں پر آ کر اپنے امیدواروں کو میدان میں اتار دیتے ہیں تو کوئی بری بات نہیں۔

انہوں نے کہا کہ اویسی صاحب کو آنے والے اسمبلی انتخابات کے مدنظر راجستھان میں اپنی زمین تلاشنی چاہیے۔

مجاہد نقوی نے کہا کہ اویسی صاحب راجستھان میں آکر ایک مرتبہ دیکھیں کہ وہ یہاں پر بی جے پی کو فائدہ تو نہیں پہنچا رہے ہیں، اس کے بعد ہی اپنے امیدواروں کو میدان میں اتارے تو اچھا رہے گا۔