اشوک گہلوت نے کہا کہ کورونا سے جنگ ساتھ ہی مجھے اور میرے اراکین اسمبلی اور وزراء کو حکومت بچانے کے لیے جدو جہد کرنی پڑرہی ہے۔
بی جے پی حکومت گرانے کی کوشش کررہی ہے۔اس معاملے میں اے ایس بی نے شکایت درج کرائی ہے اور آزاد اراکین اسمبلی سریش ٹانک ، رکن اسمبلی خوشویر سنگھ اور اوم پرکاش ہوڈلا کو پوچھ گچھ کے لیے بلایا ہے۔
راجستھان میں اراکین اسمبلی کی خرید و فروخت کی کوشش کے درمیان اشوک گہلوت نے صحافیوں کے ساتھ ویڈیو کانفرنسنگ کی۔
اسی دوران وزیر اعلی نے کہا کہ کووڈ 19 سے لڑائی کے لیے ہم بی جے پی کے اراکین اسمبلی کو ساتھ لے کر چل رہے تھے، لیکن بی جے پی رہنماؤں نے ساری حدیں پار کردی، کورونا کی جنگ کے درمیان مجھے اور پارٹی کے اراکین اسمبلی کو حکومت بچانے کے لیے بھی جدوجہد کرنی پڑرہی ہے۔
وزیر اعلی نے کہا کہ بی جے پی کے لوگ خرید و فروخت میں لگے ہوئے ہیں۔اروناچل پردیش کے ایک سابق وزیر اعلی کو خود کشی کرنا پڑا، اتراکھنڈ میں کیا کیا، مہاراشٹر میں تو تینوں نے غضب ہی کردیا، اکثریت نہ ہونے کے باوجود سیدھے حلف دلوادیا۔ کرناٹک میں بھی خرید و فروخت کرکے حکومت بنائی، مدھیہ پردیش میں بھی کیا ہوا سب کے سامنے ہے۔