جے پور: راجستھان اسمبلی انتخابات-2023 میں آج وزیر اعلیٰ اشوک گہلوت، آسام کے گورنر گلاب چند کٹاریہ، سابق وزیر اعلیٰ وسندھرا راجے، بھارتیہ جنتا پارٹی کے ریاستی صدر سی پی جوشی، سابق نائب وزیر اعلی سچن پائلٹ، اپوزیشن کے ڈپٹی لیڈر ڈاکٹر ستیش پونیا سمیت کئی لیڈروں نے حق رائے دہی کا استعمال کیا۔
اشوک گہلوت نے اپنے خاندان کے ساتھ سردار پورہ اسمبلی حلقہ میں واقع پولنگ بوتھ پر ووٹ ڈالا۔ اس موقع پر ان کی اہلیہ سنیتا گہلوت، بیٹے ویبھو گہلوت، بہو ہمانشو گہلوت نے بھی اپنا ووٹ ڈالا۔ اپنا ووٹ ڈالنے کے بعد گہلوت نے میڈیا سے کہا کہ ریاست کے ماحول سے لگتا ہے کہ ہماری حکومت بنے گی۔
انہوں نے کہا کہ خواتین اور نوجوانوں سمیت تمام ووٹرز ووٹ ڈالنے کے لیے پرجوش ہیں۔ ایک سوال پر انہوں نے کہا کہ کانگریس کے دعوے مضبوط ہیں جبکہ بی جے پی کے دعوے کھوکھلے ہیں۔ ہماری گارنٹی کام آئیں گی جب کہ مودی کی گارنٹی ناکام ہوگئی ہیں۔ اس لیے ان کی گارنٹی کی کوئی بات نہیں ہورہی ہے۔
وہیں دوسری جانب بی جے پی کے رہنماوں نے بھی اپنا اپنا ووٹ ڈالا ہے۔ ووٹ ڈالنے کے بعد میڈیا سےبات کرتے ہوئے بی جے پی کے کئی رہنماؤں نے دعوی کیا ہے کہ وہ انتخابات میں بی جے پی کو کامیابی حاصل ہوگی۔ سابق وزیراعلی وسندرا راجے نے میڈیا سے بات کرتے ہوئے کہا کہ راجستھان کے لوگ ترقیاتی اقدامات کے لئے بی جے پی کو ووٹ دیں گے۔
مزید پڑھیں: وزیراعظم مودی، کھرگے اور دیگر رہنماؤں کی راجستھان میں عوام سے ووٹ ڈالنے کی اپیل
