خواجہ غریب نواز کی شان میں گستاخی کرنے والے اینکر کے خلاف ایف آئی آر

پندرہ جون کو ایک ٹی وی ڈیبیٹ میں ایک معروف نیوز چینل کے اینکر نے خواجہ غریب نواز معین الدینؒ کی شان میں گستاخی کرتے ہوئے ان کے تعلق سے غلط بیان بازی کی تھی۔

موجودہ وقت میں عالمی وبأ کورونا وائرس کی وجہ سے جہاں ایک جانب عوام پریشان ہے وہیں دوسری جانب ایک نیوز چینل کے ایک ڈیبیٹ کے ویڈیو نے تہلکہ مچا رکھا ہے۔

نیوز اینکر کی قابل مذمت حرکت کے بعد سے ملک بھر میں خاص طور سے ریاست راجستھان کی متعدد مسلم تنظیموں نے اپنی ناراضگی کا اظہار کیا ہے۔ سوشل میڈیا پر بھی اینکر کے خلاف زبردست غصے کا اظہار کیا جا رہا ہے۔

ڈیبیٹ کا ویڈیو وائرل ہونے کے بعد راجستھان کی مختلف سماجی اور مذہبی تنظیموں کی جانب اس ٹی وی اینکر کے خلاف مورچہ کھول دیا گیا ہے، نیوز اینکر کے خلاف متعدد پولیس اسٹیشن میں ایف آئی آر بھی درج کرائی گئی ہے۔

عوام کے غصے کا اندازہ اس بات لگایا جاسکتا ہے کئی تنظیموں نے اپنے کارکنان سے ہر ضلع اور گاؤں کے پولیس اسٹیشن میں نیوز اینکر کے خلاف ایف آئی آر درج کروانے کی اپیل کی ہے۔

راجستھان مسلم پرشد تنظیم کے معین الدین کا کہنا ہے کہ 15 جون کو ایک ڈیبیٹ کے دوران نیوز اینکر نے جس طرح سے ماحول خراب کرنے کی کوشش کی ہے اور خواجہ معین الدین چشتیؒ علیہ کی شان میں گستاخی کی ہے وہ ناقابل برداشت ہے۔

انہوں نے کہا کہ ڈیبیٹ میں جس طریقے سے بیان بازی کی گئی ہے اس سے خواجہ معین الدین چشتیؒ کے عقیدت مندوں میں کافی غصہ ہے۔اس لیے تنظیم یہ مطالبہ کرتی ہے کہ متعلقہ اینکر کے خلاف تمام شہروں میں ایف آئی آر درج کروائی جائے۔