آندھرا پردیش کے نائب وزیراعلی اجمیر درگاہ کی زیارت کے لیے پہنچے

آندھرا پردیش کے نائب وزیر اعلیٰ اور اقلیتی امور کے وزیر شیخ امجد باسط آج اجمیر شریف درگاہ کی زیارت کرنے پہنچے۔ آندھراپردیش حکومت کی جانب سے خواجہ صاحب کی بارگاہ میں چادر پیش کی گئی۔

ریاست راجستھان کے ضلع اجمیر میں عالمی شہرت یافتہ درگاہ حضرت سید خواجہ معین الدین چشتی رحمۃ اللہ علیہ کی زیارت کے لیے آندھرا پردیش کے نائب وزیر اعلیٰ اور اقلیتی امور کے وزیر شیخ امجد باسط پہنچے۔ انہوں نے اجمیر شریف درگاہ میں حاضری دی اور پھول کی چادر کا نذرانہ پیش کرتے ہوئے ریاست کی خوشحالی کی دعا مانگی۔ خادم غلام سید علی اکبر جمالی نے وزیر شیخ امجد باسط کی درگاہ زیارت کروائی اور دربار کا تبرک پیش کیا۔

حضرت خواجہ غریب نواز رحمتہ اللہ علیہ کی درگاہ اجمیر شریف میں آندھرا پردیش کے وزیراعلی جگموہن ریڈی کی صحتیابی اور صوبے میں خوشحالی کی دعا مانگی گئی۔ آندھراپردیش حکومت کی جانب سے خواجہ صاحب کی بارگاہ میں چادر پیش کی گئی۔

واضح رہے کہ اس دوران آندھراپردیش کے وزیراعلی جگ موہن کی جانب سے بھی خصوصی طور پر چادر پیش کی گئی۔ نائب وزیراعلی امجد کے مطابق ان کی حکومت اقلیتوں پر خاص توجہ دیتی ہے۔ یہی وجہ ہے کہ وہ خود حکومت کے لیے خصوصی دعا مانگنے اجمیر شریف آئے ہیں۔

خواجہ صاحب کے دربار میں پہنچے نائب وزیر اعلی امجد باسط اور انکے تمام ساتھیوں کو درگاہ میں زیارت خادم غلام سید علی اکبر جمالی نے کروائی اور دستار بندی کر دربار کا تبرک پیش کیا۔ ڈپٹی سی ایم کی درگاہ زیارت کے وقت اجمیر کے ضلعی اقلیتی افسر جلال الدین بھی موجود تھے۔