ریاست بھر کے ایمبولینس کارکنان اپنے مختلف مطالبات کو لیکر آج سے غیر معینہ مدت کے لیے ہڑتال پر ہیں۔ جس کے بعد ریاست بھر میں انٹیگریٹڈ ایمبولینس سروس 108 اور 104 کا آپریشن مکمل طور پر بند کردیا گیا ہے۔ راجستھان ایمبولینس ایمپلائز یونین کے صدر وریندر سنگھ کا کہنا ہے کہ انہوں نے پہلے ہی حکومت کو ہڑتال کے بارے میں آگاہ کردیا تھا۔
انہوں نے کہا کہ ہمارے کچھ مطالبات ہیں جس کو لیکر ہم نے یہ ہڑتال کی ہے۔ وریندر سنگھ نے مزید کہا کہ حکومت راجستھان کی جانب سے ایمبولینس سروس 108 اور 104 اور بیس ایمبولینس سروس کے آپریشن کیلئے تیار کردہ نئے ٹینڈر میں ملازمین کے مفادات کو نظرانداز کیا گیا ہے۔ اور ایسی صورتحال میں اب ملازمین کی نوکریوں پر مصیبت آن پڑا ہے۔
انہوں نے بتایا کہ جو نیا ٹینڈر ہوا ہے اس میں کہیں بھی ایمبولینس ملازمین کے حق میں اور ان کی تنخواہوں سمیت دیگر مطالبات کا کہیں بھی ذکر نہیں کیا گیا ہے۔ جس کی وجہ سے ملازمین میں غم و غصہ پایا جارہا ہے اور جب تک کہ ان کے سات نکاتی مطالبات پورے نہیں کیے جائیں گے تب تک ایمبولینس ملازمین ہڑتال پر رہیں گے۔ حالانکہ ، وریندر سنگھ نے یہ بھی بتایا کہ اگر حکومت ان کے ساتھ بات چیت کرنے کی پیش کش کرتی ہے تو وہ حکومت کے افسران سے بات کریں گے۔
