اجمیر شریف درگاہ سے مسلسل ریاستی حکومت اور وزیراعلیٰ سے مطالبہ کیا جا رہا ہے کہ پھول پیش کرنے اور صوفیانہ قوالی پر عائد کردہ پابندی کو ہٹایا جائے۔ اس سلسلے میں ایک بار پھر حضرت خواجہ معین الدین چشتی رحمۃ اللہ علیہ کی درگاہ کے گدی نشین ایس ایف حسن چشتی نے وزیر اعلی اشوک گہلوت کو خط لکھ کر تمام لوگوں کی عقیدت سے آگاہ کراتے ہوئے دربار میں پھول اور صوفیانہ قوالی دوبارہ شروع کروانے کا مطالبہ کیا ہے۔
انہوں نے مزید کہا کہ درگاہ میں پھول فروخت کرنے والے چھوٹے کاروباریوں کا گزر بسر اسی پر منحصر ہے اور ایسے میں کورونا کی وجہ سے پھول پیش کرنے پر پابندی عائد کرنے کی وجہ سے ان کی معاشی زندگی بہت متاثر ہورہی ہے، جس کی وجہ سے یہ چھوٹے دوکاندار کافی پریشان ہیں۔اس لیے ان پر عائد کردہ پابندی کو ہٹانا بے حد ضروری ہے ورنہ ان دوکاندار کو مزید مشکلات کا سامنا کرنا پڑسکتا ہے۔
واضح رہے کہ کورونا گائیڈ لائن کے تحت اجمیر درگاہ میں پھول پیش کیے جانے پر ریاست راجستھان حکومت کی جانب سے پابندی ہے، یہی وجہ ہے کہ تمام مذہب کے زائرین اپنی منت اور عقیدت کے مطابق پھول چادر پیش نہیں کر پا رہے ہیں جس کی وجہ سے ان کا دل غمزدہ ہے۔
درگاہ میں پھول، چادر، پگڑیاں، دھاگا اور دستار کا کاروبار مسلم دکانداروں کے علاوہ زیادہ تر غیر مسلم خاندان کرتے ہیں, ان سب کی روزی اور روزگار کا واحد ذریعہ درگاہ ہی ہے، ایسے میں اب ان کی مالی حالات بہت خراب ہے اور انہیں روزی روٹی کے لئے بہت جدوجہد کرنی پڑ رہی ہے۔
