پانچ سو برس قدیم چراغ گِر گیا

اجمیر شریف درگاہ میں آج اس وقت ایک بڑا حادثہ ٹل گیا، جب درگاہ میں واقع آٹھ فٹ کا قدیمی چراغ زمیں بوس ہوگیا۔

ریاست راجستھان کے اجمیر شریف درگاہ میں آج ایک بڑا حادثہ ٹل گیا، دراصل درگاہ میں واقع پانچ سو برس قدیم آٹھ فٹ کا قدیمی چراغ یکایک گر گیا، غنیمت یہ رہی کی درگاہ عام زائرین کے لیے ابھی بند ہے، ورنہ یہ حادثہ مزید دردناک ہوسکتا تھا۔

بتایا جاتا ہے کہ حضرت خواجہ غریب نواز کی درگاہ کے حمیدیہ دالان میں واقع یہ چراغ پانچ سو برس قدیم ہے۔

درگاہ میں چشم دید خادموں کے مطابق درگاہ کمیٹی کے درجن بھر ملازمین چراغ کے پاس نیچے نالیوں کو درست کرنے کا کام انجام دے رہے تھے، اسی وقت برسات شروع ہونے سے وہ کنارے کھڑے ہوگئے اسی درمیان چراغ کا ایک بڑا حصہ کمزور ہونے کی وجہ سے آستانہ کی جانب گرگیا۔

خادموں کا کہنا ہے کہ درگاہ کمیٹی مکان مستری کے بجائے اپنے ملازمین سے تعمیرات کا کام لے رہی تھی، جس کی وجہ سے چراغ کی بنیاد کمزور ہوگئی اور چراغ گر گیا۔

واضح رہے کہ حمیدیہ دالان میں تین چراغ ہیں، جس کے آس پاس زائرین کا ہجوم ہمیشہ رہتا تھا، لیکن ابھی درگاہ میں کووڈ-19 کے تحت عام زائرین کے داخل ہونے پر پابندی ہے، اس لیے چراغ گرنے سے کوئی بڑا حادثہ پیش نہیں آیا۔

موقع پر پولیس اور درگاہ کمیٹی کے ذمہ داران نے پہنچ کر موقع کا معائنہ بھی کیا ہے۔