سچن پائلٹ کے میڈیا منیجر کے خلاف آئی ٹی ایکٹ کے تحت معاملہ درج

راجستھان میں سیاسی ہنگامہ آرائی کے آثار ایک بار پھر نظر آ رہے ہیں۔ اس بار سچن پائلٹ کے حامی ایم ایل اے کو چھوڑ کر پائلٹ کے میڈیا منیجر کے خلاف آئی ٹی ایکٹ کے تحت معاملہ درج کیا گیا ہے۔

دراصل ہارس ٹریڈنگ کے معاملے میں فون ٹیپنگ کا جو معاملہ پیش آیا تھا۔ اس دوران وزیر اعلی اشوک گہلوت اور سابق نائب وزیر اعلی سچن پائلٹ کے مابین آپسی اختلافات کے دوران جو خبریں دونوں اطراف سے چل رہی تھی اس معاملے میں سچن پائلٹ کیمپ کی جانب سے جیسلمیر کے ریزورٹ میں ایم ایل اے کے فون ٹیپ کرنے کے جو الزامات لگائے ہیں، اسے لیکر سچن پائلٹ کے میڈیا منیجر لوکندر سنگھ اور ایک اور شرت کمار کے خلاف مقدمہ درج ہوا ہے۔

وہیں ساؤتھ ڈی سی پی منوج کمار نے بتایا کہ فون ٹیپنگ کی گمراہ کن خبروں کو لیکر سب سے پہلے کنٹرول روم میں اطلاع ملی تھی۔ جس کے بعد، جے پور پولیس کمشنریٹ کے سائبر تھانہ آفیسر سریندر پنچولی نے ودھایک پوری تھانے میں یہ ایف آئی آر درج کروائی ہے۔ جس کی جانچ پولیس انسپکٹر اوم پرکاش متوا کر رہے ہیں۔

غورطلب ہے کہ سات اگست کے واقعے کو لیکر اب جاکر چھ اکتوبر کو مقدمہ درج ہونے سے ہر کوئی حیران ہے کہ اب اچانک پولیس نے پورے معاملے میں سرگرم کیوں ہوئی۔ ایسے میں مانا جا رہا ہے کہ معاملے میں اوپر سے کارروائی کا دباؤ ہے۔