پنجاب کے وزیراعلیٰ چرنجیت سنگھ چننی نے مرکزی حکومت پر زور دیا ہے کہ وہ تینوں زرعی قوانین کو واپس لے تاکہ کسان تحریک ختم کرکے ملک اور ریاست کی ترقی کے لیے کام کریں۔
چرنجیت سنگھ نے وزیراعلیٰ کے عہدے کا حلف لینے کے بعد اپنی پہلی پریس کانفرنس سے خطاب کے دوران کسانوں کے ساتھ کھڑے رہنے کی باتیں کی۔
اس موقع پر دونوں نائب وزیراعلیٰ سُکھ جِندر رندھاوا اور او پی سونی، ریاستی امور کے انچارج ہریش راوت، ریاستی کانگریس کے صدر نوجوت سنگھ سدھو سمیت پارٹی ممبران اسمبلی موجود تھے۔
انہوں نے بتایا کہ پنجاب ایک زرعی ریاست ہے۔ اگر کسانوں کو تکلیف پہنچی تو وہ ان کے ساتھ کھڑےہوں گے۔ اگر زراعت ڈوب جائے گی تو پنجاب اور ملک ڈوب جائے گا۔ وہ اور پوری کانگریس حکومت ماضی میں کسان کے ساتھ کھڑے تھے اور مستقبل میں بھی کسانوں کے ساتھ کھڑے رہیں گے۔ کسی بھی صورت میں کسانوں کو کمزور نہیں ہونے دیا جائے گا۔
چرنجیت سنگھ چننی نے کہا کہ امریندر سنگھ حکومت نے کسانوں، دلتوں اور غریبوں کے لیے بہت کچھ کیا ہے اور ان کے کام کو آگے بڑھایا جائے گا۔ کسانوں کو بجلی اور پانی کی مفت سہولت جاری رہے گی۔