ہرسمرت کور نے وزیر اعظم کو خط لکھا

ہرسمرت کور بادل نے وزیر اعظم کو خط لکھ کر اپیل کی ہے کہ خصوصی ٹرینوں کے ذریعے حضور صاحب اور پٹنہ صاحب میں پھنسے ہوئے عقیدت مندوں کو پنجاب واپس لایا جائے۔

فوڈ پروسیسنگ انڈسٹری کی مرکزی وزیر ہرسمرت کور بادل نے وزیر اعظم سے خط کے ذرہعے اپیل کی ہے کہ خصوصی ٹرینوں کے ذریعے تخت شری حضور صاحب، ناندیڑ اور تخت شری پٹنہ صاحب میں پھنسے ہوئے عقیدت مندوں کو پنجاب واپس لایا جائے۔

پنجاب: ہرسمرت کور بادل نے وزیر اعظم کو خط لکھا

مرکزی وزیر نے وزیر اعظم کو لکھے گئے خط میں کہا کہ شری حضور میں تقریباً تین ہزار عقیدت مند پھنسے ہوئے ہیں اور شری پٹنہ صاحب میں تقریبا 2 ہزار عقیدت مند پھنسے ہوئے ہیں۔

انہوں نے کہا کہ لاک ڈاؤن میں اضافہ ہونے کی وجہ سے ان عقیدت مندوں کو مزید مشکلات کا سامنا کرنا پڑے گا۔

انہوں نے بتایا کہ دونوں مقامات پر وہ گوردوارہ صاحب میں بند ہیں اور گرودوارہ کے منیجر ان کے کھانے پینے اور رہنے کا انتظام کررہے ہیں۔

بادل نے خط میں زور دیا ہے کہ اب 15 اپریل سے گیہوں کی کٹائی کا موسم شروع ہو رہا ہے، جس کی وجہ سے ان عقیدت مندوں کی ان کے گھروں میں واپسی کو یقینی بنانا اب اور بھی اہم ہو گیا ہے۔

انہوں نے کہا کہ ان خاندانوں کی پورے سال کی آمدنی کا انحصار گیہوں کی فصل پر ہوتا ہے، جو ان کی معاش کا واحد ذریعہ ہے۔