ریاست پنجاب کے امرتسر میں بین الاقوامی سرحد پر بی ایس ایف جوانوں نے ایک درانداز کو ہلاک کرنے کا دعویٰ کیا ہے۔
خبر رساں ایجنسی کے مطابق دفاعی ذرائع نے بتایا کہ جمعرات کی شام امرتسر میں بین الاقوامی سرحد پر دراندازوں کی جانب سے بھارتی حدود میں داخل ہونے کی کوشش کی، تاہم بی ایس ایف جوانوں نے اس کوشش کو ناکام بناتے ہوئے ایک درانداز کو ہلاک کر دیا ہے۔
دفاعی ذرائع نے بتایا کہ دراندازوں کی نقل و حرکت دیکھنے کے بعد فوری طور پر بی ایس ایف جوانوں نے کاروائی کی اور ایک درانداز کو گولی کا نشانہ بنا کر اسے ہلاک کر دیا۔
ذرائع نے بتایا کہ بی ایس ایف جوانوں نے یہ کاروائی ساڑھے آٹھ بجے کے قریب انجام دی۔
واضح رہے کہ دو روز قبل جموں کے کھٹوعہ ضلع میں فوج نے دعویٰ کیا تھا کہ انہوں نے ضلع میں بین الاقوامی سرحد پر ایک سرنگ کا پتہ لگایا ہے۔ فوج نے دعویٰ کیا تھا کہ یہ سرنگ عسکریت پسندوں کے بھارتی حدود میں داخل ہونے کے لیے بنائی گئی ہے۔
