اروند کیجریوال نے جہاں دہلی ماڈل کے ذریعے پنجاب کی سیاست میں جگہ بنانے کی کوشش کی وہیں بھگونت مان کی ان تھک محنت نے ریاست کے اقتدار پر قابض ہونے کی کوشش میں اہم کردار ادا کیا۔ ابتدائی رجحانات کے مطابق عام آدمی پارٹی پنجاب میں واضح اکثریت کے ساتھ اقتدار میں آرہی ہے۔ Bhagwant Mann Political Career
بھگونت مان عام آدمی پارٹی کے واحد لوک سبھا رکن ہیں۔ اس سے قبل بھگونت مان نے سنہ 2014 کے لوک سبھا انتخابات میں بھی کامیابی حاصل کی تھی اور اس کے بعد دوسری بار لوک سبھا انتخابات جیتنے میں کامیاب رہے۔
عام آدمی پارٹی نے گزشتہ برس ہی انہیں پنجاب کا ریاستی صدر مقرر کیا۔ وہیں انتخابی تاریخوں کا اعلان ہوتے ہی پارٹی نے بھگونت مان کو وزیر اعلیٰ کے چہرہ کے طور پر بھی پیش کیا۔
بھگونت مان کہتے ہیں کہ سیاست میں آکر انہیں بہت کچھ کھونا پڑا۔ بھگونت مان کی سنہ 2015 میں اپنی بیوی سے طلاق ہوگئی۔ کچھ عرصے تک وہ بچوں سے رابطے میں رہے لیکن بعد میں ان سے بھی رابطہ ٹوٹ گیا۔
مزید پڑھیں:
سنہ 1973 میں سنگرور ضلع میں پیدا ہونے والے بھگونت مان نے بطور مزاح نگار بہت شہرت پائی۔ انہوں نے کئی اسٹیج شوز اور فلموں میں بھی کام کیا۔ لیکن بعد میں عام آدمی پارٹی میں شامل ہو گئے۔ سنہ 2014 اور 2019 کے لوک سبھا انتخابات میں کامیاب ہوئے اور عام آدمی پارٹی کے پہلے واحد رکن پارلیمان بھی بنے۔
معاشی طور پر بھی بھگونت مان کافی مضبوط بتائے جارہے ہیں۔ سنہ 2014 کے لوک سبھا انتخابات میں انہوں نے حلف نامہ میں اپنی جائیداد 4 کروڑ 29 لاکھ روپے کا انکشاف کیا تھا۔ طلاق کے بعد بھگونت مان نے اپنے کل اثاثے 1 کروڑ 84 لاکھ بتائے تھے۔ سنہ 2019 کے حلف نامے میں انہوں نے اپنے کل اثاثے 1 کروڑ 64 لاکھ روپے ظاہر کیے تھے۔
