پانپور: دودھ کے نمونے ٹیسٹنگ کے لیے روانہ

جنوبی کشمیر کے قصبہ پانپور میں محکمہ فوڈ اینڈ سیفٹی کی جانب سے کارروائی کے دوران مختلف دودھ فروشوں سے دودھ کے نمونے حاصل کرکے ٹیسٹنگ کے لیے روانہ کیے گئے۔

محکمہ فوڈ اینڈ سیفٹی کی جانب سے غیر معیاری دودھ فروخت کرنے والوں کے خلاف کارروائی کرتے ہوئے محکمہ کے افسران نے مختلف دودھ فروشوں سے دودھ کے نمونے حاصل کرکے انہیں ٹیسٹ کے لیے لیبارٹی روانہ کیا۔

میڈیا سے بات کرتے ہوئے فوڈ افسر نے کہا کہ بازار میں غیر معیاری اور ملاوٹی دودھ فروخت کیے جانے کی شکایات موصول ہونے کے بعد انہوں نے قصبہ پانپور میں مہم کا آغاز کیا۔

دودھ فروشوں سے دودھ کے نمونے حاصل کرنے کے بعد انہوں نے میڈیا کو بتایا: ’’دودھ کے نمونے معائنہ کے لیے لیبارٹی بھیجے جائیں گے، دو ہفتوں تک انکی رپورٹ متوقع ہے۔‘‘

انہوں نے کہا کہ ٹیسٹ رپورٹ میں اگر کسی نمونے میں غیر معیاری یا ملاوٹی دودھ پایا گیا تو دودھ فروش کے خلاف سخت سے سخت کارروائی عمل میں لائی جائے گی۔