کورونا وائرس کی وجہ سے عرس تقریبات موخر

مسلسل لاک ڈاون سے جہاں وادی میں سیاسی اور سماجی تقریبات متاثر ہو رہی ہیں وہیں اب کورونا وائرس اور لاک ڈاون کا یہ سایہ مذہبی تقریبات پر بھی پڑنے لگا ہے۔

جنوبی کشمیر کے ضلع پلوامہ کے ترال علاقے میں خانقاہ فیض پناہ ترال میں آنے والے عرس تقریبات کو موخر کیا گیا ہے۔ اس سلسلے میں مقامی اوقاف کمیٹی کی طرف سے باضابطہ ایک پریس ریلیز بھی جاری کی گئی ہے جس میں واضح کیا گیا ہے کہ موجودہ صورتحال کے پیش نظر عرس مبارک کی تقریب 27 اور 28 جولائی کو منائی جانی تھی جس کو موخر کیا گیا ہے۔

عقیدت مندوں نے جہاں اس فیصلے کو بروقت قرار دیا ہے وہیں ان کا کہنا ہے کہ امسال تقریبات منعقد نہ ہونے سے ان کے جزبات بھی متاثر ہوئے ہیں، تاہم فی الوقت جاری کورونا قہر کے نیتجے میں اسے منعقد نہیں کیا جا سکتا۔

ادارہ اوقاف اسلامیہ ہمدانیہ ترال کے چیرمئین پیر محمد یاسین شاہ نے ای ٹی وی بھارت کو بتایا کہ 'موجودہ صورتحال کے پیش نطر عرس مبارک کی تقریب کو علماء کرام کی مرضی کے مطابق ہی موخر کیا گیا ہے۔'

انہوں نے کہا کہ 'عوام کو عالمی وبا کورونا وائرس کے بڑھتے ہوئے واقعات کو دیکھ کر جہاں لاک ڈاون کی پاسداری کرنی چاہئیے وہیں رجوع اللہ کر کے اپنے گناہوں کی معافی مانگنی چاہیئے۔'

واضح رہے کہ خانقاہ فیض پناہ ترال وادی کی قدیم زیارت گاہوں میں شمار ہوتی ہے جہاں ہر سال چھہ زلحجہ کو عرس مبارک کی تقریب منائی جاتی تھی اور تبرکات کی نشاندی بھی کی جاتی ہے، تاہم گزشتہ برس بھی دفعہ 370 کی تنسیخ کے بعد عرس کی تقریبات کو ملتوی کیا گیا تھا اور اب کورونا وائرس کی وجہ سے عرس کو فی الحال موخر کیا گیا ہے۔