ہارٹیکلچر شعبے کو مستحکم بنانا مرکزی سرکار کی اولین ترجیح: مرکزی وزیر زراعت

مرکزی وزیر برائے زراعت نے جموں و کشمیر کے دورے کے دوران ہارٹیکلچر نرسری زاورہ، سرینگر میں منعقدہ ایک تقریب میں کسانوں کے ساتھ ملاقات کی۔

ہارٹیکلچر سیکٹر کو فروغ دینے اور کسانوں کی آمدنی میں اضافہ کیے جانے کی غرض سے جمعرات کو ہارٹیکلچر نرسری زاورہ، سرینگر میں ایک تقریب منعقد کی گئی۔ تقریب میں مرکزی وزیر برائے زراعت نریندر سنگھ تومر نے مہمان خصوصی کے طور پر شرکت کی، جب کہ ایڈیشنل سیکریٹری منسٹری آف ایگریکلچر وویک اگروال کے علاوہ پرنسپل سیکریٹری اسکاسٹ نوین کمار چودھری اور گورنر کے مشیر فاروق احمد خان کے علاوہ محکمہ ہارٹیکلچر کے اعلیٰ افسران نے شرکت کی۔

تقریب کے دوران مرکزی وزیر زراعت نریندر سنگھ تومر نے کسانوں کے ساتھ بات چیت کی۔ کسانوں نے ہارٹیکلچر سیکٹر کو مزید مستحکم بنانے اور کسانوں کو زیادہ سے زیادہ منافع پہنچانے کے لئے مختلف مطالبات وزیر کے گوش گزار کئے۔ مرکزی وزیر نے کسانوں کو یقین دلایا کہ ان کے تمام جائز مطالبات کو ترجیحی بنیادوں پر حل کرنے میں وہ اپنا کلیدی رول ادا کریں گے۔

تومر نے ذرائع ابلاغ کے نمائندوں سے بات کرتے ہوئے کہا کہ ’’مرکزی سرکار کسانوں کی بہبودی کے لئے وعدہ بند ہے اور جموں کشمیر میں کسانوں کو ہر طرح کی سہولیات بہم پہنچانے کے لئے پہلے متعدد کوششیں کا جا رہی ہیں اور مستقبل میں بھی کسانوں کو زیادہ سے زیادہ فائدہ پہنچانا مرکزی سرکار کی اولین ترجیح رہے گی۔‘‘

انہوں نے مزید کہا کہ ’’معیشت اور اقتصادی حالت کو مضبوط بنانے کے لیے ہارٹیکلچر کو تقویت دینا ناگزیر ہے۔‘‘