ترال: گولی لگنے سے زخمی خاتون کی ہسپتال میں موت

گنڈ، ترال کی رہنے والی شکیلہ زوجہ غلام نبی گنائی 16 اپریل کی درمیانی شب گولی لگنے سے زخمی ہو گئی تھیں۔

جموں و کشمیر کے ضلع پلوامہ کے ترال علاقے میں سولہ اپریل کی درمیانی شب کو ایک خاتون کو گولی لگنے کے بعد ہسپتال میں داخل کرایا گیا تھا، جس کے بعد آج اس کی موت ہو گئی ہے۔

تفصیلات کے مطابق گنڈ، ترال کی رہنے والی 36 سالہ شکیلہ زوجہ غلام نبی گنائی گولی لگنے سے زخمی ہو گئی تھیں جس کے بعد اہل خانہ نے پہلے ترال ہسپتال اور بعدازاں سرینگر کے بون اینڈ جوائنٹ اسپتال میں اسے داخل کرایا جہاں آج اس کی موت ہو گئی۔

معاملے کے بارے میں مزید تفصیلات فراہم کرتے ہوئے ایس ایس پی اونتی پورہ محمد یوسف چودھری نے کہا کہ 'پولیس پارٹی نے شکیلہ بانو کے گھر کا دورہ کیا ہے، وہاں انہیں ایک بلٹ ملی ہے۔ کیس درج کر لیا گیا ہے اور مزید تحقیقات جاری ہے'۔

پولیس کا کہنا ہے 'اہل خانہ نے خاتون کو لگی گولی کی چوٹ چھپانے کی کوشش کی ہے اور اسے قریبی اسپتال منتقل کردیا جہاں سے اسے سب ڈسٹرکٹ ہسپتال ترال ریفر کردیا گیا۔ تاہم، بعد میں انہیں سرینگر کے ایس ایم ایچ ایس اسپتال ریفر کیا گیا جہاں ڈاکٹروں نے بتایا کہ خاتون کو گولی لگی ہے'۔

پولیس کے بیان کے مطابق 'شکیلہ کے شوہر اور اس کے سسرال والوں نے ڈاکٹر کو کہا تھا کہ اسے "پیٹ میں درد یا پھر دل کی تکلیف" کا سامنا ہے'۔

پولیس نے بتایا کہ خاتون کو گولی کیسے لگی تھی اس معاملے کی تحقیقات جاری ہے۔