ضلع پلوامہ کو آرینج زون کے زمرے میں شامل کیا گیا ہے اس وجہ سے علاقہ ترال سمیت ضلع بھر میں دکانداروں کو محدود پیمانے پر دکانیں کھولے جانے کی اجازت دی جا رہی ہے جبکہ پبلک ٹرانسپورٹ کی نقل و حمل پر ابھی بھی پابندی عائد ہے، اس فیصلے سے دکاندار مطمئن نظر نہیں آ رہے ہیں۔
ترال: لاک ڈاؤن میں نرمی کا مطالبہ قصبہ ترال کے دکانداروں کا کہنا ہے کہ پبلک ٹرانسپورٹ بند ہونے سے انکا کاروبار بے حد متاثر ہو رہا ہے۔ انہوں نے دیگر اضلاع کی طرح پلوامہ میں بھی پبلک ٹرانسپورٹ کی نقل و حمل پر عائد پابندی کو ہٹائے جانے کا مطالبہ کیا ہے۔
ای ٹی وی بھارت کے ساتھ بات کرتے ہوئے قصبہ ترال کے متعدد دکانداروں نے ضلع انتظامیہ سے لاک ڈائون میں نرمی دیے جانے کا مطالبہ کیا ہے۔
دکانداروں نے ای ٹی وی بھارت کے ساتھ بات کرتے ہوئے کہا کہ مسلسل لاک ڈائون کے باعث سبھی شعبہ ہائے زندگی متاثر ہو رہے ہیں۔ انہوں نے کہا کہ علاقے میں محدود پیمانے پر دکانیں کھولے جانے کی اجازت دی گئی ہے تاہم پبلک ٹرانسپورٹ بند ہونے کے سبب عوامی نقل و حمل پوری طرح سے ٹھپ ہے جس کے باعث انکا کاروبار متاثر ہو رہا ہے۔
انہوں نے دکانداروں کے ساتھ ساتھ پبلک ٹرانسپورٹ کی محدود آواجاہی کو یقینی بنائے جانے کی انتظامیہ سے اپیل کی ہے۔
