سیاحتی مقام شکار گاہ میں رضاکارانہ صفائی مہم کا آغاز

مہم میں محکمہ وائلڈ لائف، میونسپل کمیٹی ترال سے وابستہ اہلکار اور ایس ایچ او ترال جی ایم راتھر کے علاوہ رضاکار نوجوانوں کی ایک بڑی تعداد نے شرکت کی۔

جنوبی کشمیر کے سب ڈسٹرکٹ ترال کے مشہور سیاحتی مقام شکار گاہ میں صفائی کے فقدان کو دیکھ کر رضاکارانہ طور پر آج چند نوجوانوں نے رضاکار تنظیم اور پولیس و سیول انتظامیہ کے باہمی اشتراک سے شکارگاہ کے اندر کوڑا کرکٹ صاف کیا۔

اس موقع پر رضاکاروں نے مشہور سیاحتی مقام کی صفائی کی اور پارک میں موجود کچرے کو ہٹایا۔

اس ضمن میں ای ٹی وی بھارت کے ساتھ بات کرتے ہوئے ترال کے ایک مقامی صحافی اور سماجی کارکن عرفان امین نے بتایا کہ گزشتہ دنوں اس نے اپنے چند ساتھیوں کے ہمراہ شکارگاہ کا دورہ کیا تھا جس دوران وہاں گندگی کے ڈھیر دیکھ کر وہ بہت مایوس ہوا اور اسی وقت انہوں نے شکارگاہ کو صاف کرنے کا فیصلہ کیا۔ انہوں نے سماجی ویب سائٹس کا استعمال کر کے نوجوانوں کی توجہ اس جانب مبذول کرائی جسکے بعد ایک بڑی تعداد میں نوجوانوں نے اس مہم میں جڑنے کا ارادہ ظاہر کیا اور آج انہوں نے یہ کارنامہ انجام دیا۔
اس مہم میں محکمہ وایلڈ لایف، میونسپل کمیٹی ترال سے وابستہ اہلکار اور ایس ایچ او ترال جی ایم راتھر کے علاوہ رضاکار نوجوانوں کی ایک بڑی تعداد نے شرکت کی۔
واضح رہے کہ ای ٹی وی بھارت نے شکارگاہ میں موجود بریڈنگ سینٹر کی ناگفتہ حالت اور صفائی کے فقدان پر حال ہی میں دو بار رپورٹس نشر کی تھیں۔