ترال: رابطہ پل ڈہہ جانے کے سبب لوگوں کو مشکلات

جنوبی کشمیر کے سب ضلع ترال میں گزشتہ دنوں ندی میں طغیانی کے سبب رابطہ پل ڈہہ جانے سے لوگوں کو شدید مشکلات کا سامنا کرنا پڑ رہا ہے۔

ضلع پلوامہ کے قصبہ ترال کے بالائی علاقوں میں گزشتہ دنوں بادل پٹھنے سے آئی طغیانی کے سبب لام علاقے میں تین عارضی پل ڈہہ گئے تھے۔ رابطہ پلوں کے ڈہہ جانے کے سبب لام علاقے کے آس پاس رہائش پذیر لوگوں کو رابطہ سہولیات میسر نہ ہونے سے دقتوں کا سامنا کرنا پڑ رہا ہے۔

مقامی باشندوں نے بتایا کہ رابطہ پلوں کو ہوئے نقصان کے باعث سوئی ناڑ، دیدار پورہ، ززبل اور نزدیکی گجر پتی کے باشندے گھروں کے اندر ہی محصور ہو کر رہ گئے ہیں۔

سوئی ناڑ کے نمبردار نے بتایا کہ حالیہ دنوں آئے سیلاب سے عارضی پل ڈہہ جانے کے علاوہ علاقے میں بجلی کا ترسیلی نظام بھی بری طرح متاثر ہوا ہے۔ انہوں نے الزام عائد کرتے ہوئے کہا کہ ’’انتظامیہ تساہل پسندی سے کام لے رہی ہے۔‘‘

میڈیا سے بات کرتے ہوئے مقامی باشندوں نے بتایا کہ ندی میں آئی طغیانی کے سبب سیلاب کا پانی کھیتوں اور رہائشی مکانات میں بھی داخل ہو رہا ہے۔ انہوں نے کہا کہ حکام سے بار ہا گزارشات کرنے کے باوجود نالے کے اطراف میں بنڈ تعمیر نہیں کیے گئے جس کے سبب سیلاب نے علاقے میں تباہی مچا دی۔

انہوں نے کہا کہ اگر فوری طور علاقے میں بنڈ اور رابطہ پل تعمیر نہ کیے گئے تو مقامی باشندے ہجرت کرنے پر مجبور ہو جائیں گے۔