ترال: پولنگ پرامن طور پر اختتام پذیر

اس حلقہ سے چھ امیدوار میدان میں ہیں جن میں بی جے پی کا ایک، اپنی پارٹی کا ایک، نیشنل کانفرنس کا ایک اور تین دیگر ازاد امیدوار شامل ہیں۔

ڈی ڈی سی انتخابات کے پانچویں مرحلے کے تحت آج وادی کے کئی علاقوں کی طرح ترال کے ڈاڈسرہ بلاک میں ووٹنگ پر امن طور پر اختتام پذیر ہوئی۔ اگرچہ سردی کی وجہ سے صبح رائے دہندگان کی کم تعداد پولنگ بوتھز پر نظر آئی۔

رائے دہندگان کے بقول وہ اپنے بنیادی مسائل کو حل کرنے کے لیے ہی اپنے ووٹ کو استعمال کر رہے ہیں۔ یہاں رائے دہندگان کی کل تعداد 27206 ہے، جبکہ اس حلقہ سے چھ امیدوار میدان میں ہیں جن میں بی جے پی کا ایک، اپنی پارٹی کا ایک، نیشنل کانفرنس کا ایک اور تین دیگر ازاد امیدوار شامل ہیں۔ ووٹرز کی سہولیات کے لیے 52 پولنگ بوتھز کو 23 مراکز میں تبدیل کیا گیا ہے۔

ڈاڈسرہ بلاک کے لیے مجموعی طورپر 839 ووٹرز نے اپنے حق کا استعمال کیا۔ جن میں مرد ووٹرز کی تعداد 513 اور خواتین ووٹرز کی تعداد 326 ہے۔ علاقے میں کل سے ہی انٹرنیٹ کی سہولیات کو احتیاطی طور پر بند کر دیا گیا تھا۔