پلوامہ: ذرا نم ہو تو یہ مٹی بہت زرخیز ہے ساقی

پلوامہ میں انتظامیہ کی جانب سے نوجوان شعراء کے لیے ایک آن لائن مقابلہ کروایا گیا تھا، جس میں ترال کی مونسا نے بازی ماری۔

جموں و کشمیر کے ضلع پلوامہ میں انتظامیہ کی جانب سے کچھ روز قبل کورونا وارئرس کے تیئں اظہار تشکر کے لیے ضلع بھر کے نوجوان شعراء کو اپنا کلام آن لائن بھیجنے کو کہا گیا تھا۔

انتظامیہ کی اس پہل میں سینکڑوں نوجوانوں نے اپنا کلام پیش کیا تاہم اس مقابلے میں ترال بالا کی رہنے والی ایک طالبہ مونسا بنت پیرزادہ عبدل وحید نے پہلی پوزیشن حاصل کی۔

ای ٹی وی بھارت سے بات کرتے ہوئے مونسا نے بتایا 'ضلع انتظامیہ نے جب یہ اعلان کیا تو میں نے بھی کورونا واریئرس کے تئیں خراج تحسین پیش کرنے کے لیے ایک نظم لکھی اور اسکو آن لائن مقابلے میں بھیج دیا'۔

مونسا کہتی ہیں 'ان کو یہ یقین نہیں تھا کہ وہ اس مقابلے میں اول نمبر پر آسکتی ہیں لیکن جب نتائج کا اعلان کیا گیا تو وہ اپنا نام دیکھر بہت خوش ہوئیں'۔

وہ کہتی ہیں 'اللہ کا شکر ہے جس نے مجھے کامیابی سے ہمکنار کیا اور ساتھ ہی اپنے والدین کا بھی شکریہ ادا کرتی ہوں کہ انکے تعاون کے بغیر یہ ممکن نہیں تھا'۔

مونسا کہتی ہیں کہ کرونا وائرس کے خلاف جنگ میں ہماری زندگیوں کو بچانے کے لیے جو لوگ فرنٹ لائن پر کام کر رہے ہیں ان کے لیے ہی اس نے یہ نظم لکھی ہے۔

مونسا کے والد پیرزادہ عبدل وحید نے کہا 'ضلع انتظامیہ پلوامہ کی جانب سے منعقد کیا گیا یہ شاعری مقابلہ ایک اچھی پہل ہے اور اس سے موجودہ تناؤ بھرے ماحول میں ایک مثبت سوچ ابھر سکتی ہے'۔

انہوں نے مزید کہا 'کرونا وائرس کے خلاف جنگ میں ہم سب کو مشترکہ طور پر لڑنی ہے'۔