سنگرونی کے جنگلات سے کاٹی گئی لکڑی بڈگام میں ضبط، ملزم گرفتار

محکمہ جنگلات کے عہدیداروں نے مصدقہ اطلاع موصول ہونے کے بعد ضلع پلوامہ کے سنگرونی کے جنگلات سے غیر قانونی طور کاٹی گئی لکڑی کو ضلع بڈگام کے پکھرپورہ علاقے میں ضبط کرکے ملزم کو حراست میں لے لیا۔

محکمہ جنگلات کے افسران نے منگل اور بدھ کی درمیانی شب ضلع بڈگام کے پکھرپورہ علاقہ میں ایک گاڑی سمیت بھاری مقدار میں غیر قانونی طور جنگلات سے کاٹی گئی لکڑی کو ضبط کیا۔

عہدیداروں کے مطابق لکڑی کو ضلع پلوامہ کے سنگرونی کے جنگلات سے لایا جا رہا تھا۔ انہوں نے کہا کہ ایک مصدقہ اطلاع موصول ہونے کے بعد محکمہ جنگلات کے افسران نے پکھرپورہ میں صبح کے قریب 3بجے ایک گاڑی زیر رجسٹریشن نمبر JK01H-5157سے درجنوں مکعب فٹ لکڑی ضبط کر لی۔

انہوں نے مزید کہا کہ لکڑی اور گاڑی کو ضبط کرکے گاڑی کے ڈرائیور کو پلوامہ پولیس کے سپرد کر دیا گیا۔