جنوبی کشمیر کے اونتی پورہ علاقے میں گذشتہ دنوں ایک ایس پی او، اس کی اہلیہ اور بچی کو عسکریت پسندوں نے گولی مار کر ہلاک کر دیا تھا، جس کے بعد آج بی جے پی کے ترجمان الطاف ٹھاکر نے انتظامیہ سے اپیل کی ہے کہ مقتول کے بیٹے کو سول نوکری دی جائے۔
گذشتہ دنوں قتل کیے گئے ایس پی او فیاض احمد کے گھر سیاسی رہنماوں کی تعزیت پرسی کا سلسلہ جاری ہے۔ آج بھی بھارتیہ جنتا پارٹی کے ترجمان الطاف ٹھاکر نے چند دیگر رہنماوں کے ہمراہ ہاری پاریگام اونتی پورہ کا دورہ کیا، جہاں انہوں نے فیاض احمد کے لواحقین سے تعزیت کا اظہار کیا۔
'مہلوک ایس پی او کے بیٹے کو سول نوکری فراہم کی جائے'
انہوں نے مقتول کے بیٹے لیاقت کو بھروسہ دلایا کہ بی جے پی دکھ کی گھڑی میں میں ان کے غم میں برابر کی شریک ہے۔ انہوں نے بتایا کہ ہاری پاریگام کا واقعہ عسکریت پسندی کی بدترین مثال ہے اور اس کی جتنی بھی مذمت کی جائے وہ کم ہے۔