شوپیاں میں نوجوان کی لاش برآمد، لواحقین نے قتل کا الزام عائد کیا

ضلع شوپیان کے ناگبل، اروپارہ علاقے سے تعلق رکھنے والے 22 سالہ نوجوان کی لاش ضلع کے ترکوانگام علاقے سے برآمد ہوئی ہے۔

ضلع شوپیان کے ناگبل، اروپارہ علاقے سے تعلق رکھنے والے 22 سالہ نوجوان شاہد منظور ولد منظور احمد گنائی کی لاش ضلع کے ترکوانگام علاقے میں برآمد ہونے کے بعد میت کو پوسٹ مارٹم کے لیے ضلع ہسپتال پلوامہ پہنچایا گیا۔

لواحقین نے پلوامہ میں احتجاج کرتے ہوئے اسے قتل قرار دیکر پولیس اور انتظامیہ سے تفتیش کا مطالبہ کرتے ہوئے قاتلوں کو سزا دیے جانے کی مانگ کی۔

نوجوان کے لواحقین نے دعویٰ کیا کہ ’’شاہد کے ترکوانگام (جہاں سے اسکی لاش برآمد ہوئی ہے) کی ایک لڑکی کے ساتھ تعلقات تھے جس کے ساتھ وہ نکاح کا خواہش مند تھا۔‘‘ انہوں نے الزام عائد کرتے ہوئے کہا کہ ’’لڑکی نے اسے ترکوانگام ملنے کے لیے بلایا تھا۔‘‘

انہوں نے مزید کہا کہ دیر رات گئے انہیں پولیس نے ضلع اسپتال پلوامہ پہنچنے کو کہا جہاں وہ شاہد کی لاش دیکھ کر حیران رہ گئے۔

لوحقین کے مطابق ’’شاہد کا قتل کیا گیا‘‘ جس کی انہوں نے تحقیقات کا مطالبہ کرتے ہوئے انتظامیہ سے انصاف کی مانگ کی۔

اس ضمن میں زین پورہ پولیس اسٹیشن میں معاملہ درج کرکے مزید تحقیقات شروع کر دی گئی ہے۔