South Kashmir Village Sans Basic Facilities: جنوبی کشمیر کا شاجن علاقہ بنیادی سہولیات سے محروم

ترال علاقے کے ایک پسماندہ گاؤں شاجن کے باشندوں نے کا دعویٰ ہے کہ حکومت سمیت منتخب عوامی نمائندوں نے اس علاقے کو جان بوجھ کر پس پشت ڈال دیا ہے۔ علاقے میں بنیادی سہولیات کے فقدان کے باعث لوگوں کو سخت مشکلات کا سامنا ہے۔

پلوامہ (جموں کشمیر) :ایل جی انتظامیہ کی جانب سے دیہی علاقوں میں بنیادی سہولیات کی فراہمی کے حوالے سے بیانات بڑے پیمانے پر جاری کیے جاتے ہیں تاہم جنوبی کشمیر کے ترال علاقے کے ایک گاؤں - شاجن - میں آج کے جدید دور میں بھی لوگوں کو بنیادی سہولیات کی عدم دستیابی سے زبردست پریشانیوں کا سامنا ہے۔ ترال ٹاؤن سے قریبا تیرہ کلومیٹر دور شاجن کا یہ علاقہ سطح سمندر سے کافی اونچائی پر واقع ہے اور یہ علاقہ چند سال قبل تک رابطہ سڑک سے بھی محروم تھا۔

جہاں چند سال قبل اگرچہ پی ایم جی ایس وائی نے یہاں رابطہ سڑک کی تعمیر شروع کی تھی تاہم مقامی لوگوں کے مطابق یہ سڑک ادھوری ہے کیونکہ جہاں بستی ہے وہاں تک سڑک کی تعمیر نہیں کی گئی جس کی وجہ سے لوگوں کو عبور مرور میں دقتوں کا سامنا ہے۔ گاؤں میں اگرچہ بجلی سپلائی بحال کی گئی ہے تاہم بجلی کا ترسیلی نظام زبوں حالی کا شکار ہے۔ بجلی ترسیلی لائنز کو کھمبوں کے بجائے چھوٹے درختوں کے سہارے باندھ دیا گیا ہے جس کی وجہ سے حادثات کا خطرہ ہمیشہ لاحق رہتا ہے۔

مقامی لوگوں کے مطابق ‘’’اب مصیبت یہ بھی ہے کہ غریب گجروں کو اب گھروں سے ہی بے دخل کیا جا رہا ہے، حالانکہ اراضی ہمارے نام پر درج ہے لیکن نہ جانے ’سب کا ساتھ سب کا وکاس‘ کس بات کا نام ہے۔‘‘ ای ٹی وی بھارت کے ساتھ بات کرتے ہوئے شاجن علاقے کے باشندوں نے الزام عائد کیا کہ ’’الیکشن کے موقع پر لوگوں سے ووٹ حاصل کرنے کے لیے سیاسی لیڈران یہاں آتے تو ہیں لیکن پھر اگلے انتخابات تک نظر بھی نہیں آتے۔‘‘

ترال کے دور افتادہ علاقے شاجن کی آبادي نے ایل جی انتظامیہ سے اپیل کی ہے کہ گاؤں میں بنیادی سہولیات کی فراہمی کو یقینی بنانے کے لیے ٹھوس اقدامات اٹھائے جائیں۔ ادھر، مقامی ڈی ڈی سی ممبر منظور گنائی نے نمائندے کو فون پر بتایا کہ وہ جلد ہی اس علاقے کا دورہ کریں گے اور صورتحال کا جائزہ لیں گے۔