مظاہروں کے دوران ایک شہری ہلاک

ہلاک شدہ شخص کی شناخت جہانگیر یوسف وانی ولد محمد یوسف ساکن اٹھمولہ ہال کے طور پر ہوئی ہے، بتیس سالہ جہانگیر کی گردن میں گولی لگی تھی اور وہ موقعے پر ہی ہلاک ہوگیا۔

جموں و کشمیر کے جنوبی ضلع پلوامہ میں گزشتہ روز حزب المجاہدین کے چیف آپریشنز کمانڈر ریاض نائکو کی ہلاکت کے بعد ہوئے تشدد کے سے ہو کا عالم طاری ہے۔

آج صبح مقامی لوگوں نے مظاہروں کی کوشش کی لیکن انہیں منتشر کردیا گیا۔

ذرائع کے مطابق گزشتہ روز نائکو اور ان کے ساتھی کی ہلاکت کے بعد بڑے پیمانے پر تشدد بھڑک اٹھا۔ مظاہرین کی تعداد سیکڑوں بیں تھی جنہیں منتشر کرنے کیلئے پولیس اور سکیورٹی فورسز نے پیلٹ فائر کئے اور گولیاں چلائیں۔

پولیس ذرائع کے مطابق فائرنگ میں کم از کم ایک شخص کی موت واقع ہوئی ہے۔

ہلاک شدہ شخص کی شناخت جہانگیر یوسف وانی ولد محمد یوسف ساکن اٹھمولہ ہال کے طور ہوئی ہے۔ بتیس سالہ جہانگیر کی گردن میں گولی لگی تھی اور وہ موقعے پر ہی ہلاک ہوگیا۔

مظاہرین نے اس کی لاش اپنی تحویل میں لیکر بعد میں اسے آبائی قبرستان میں دفن کیا۔

جہانگیر کے لواحقین میں اس کے دو بچے اور بیوی شامل ہے۔

دریں اثنا ریاض نائکو کے ساتھ جو دوسرا عسکریت پسند ہلاک ہوا ہے اس کی شناخت عادل احمد بٹ عرف نعمان ساکن پنجرن پلوامہ کے طور ہوئی ہے۔

عادل، ڈیڑھ سال قبل عسکریت پسندوں کی صف میں شامل ہوا تھا اور ان دنوں ریاض نائکو کے معاون کی حیثیت سے کام کررہا تھا۔

ریاض اور عادل کی لاشوں کو رات گئے سونمرگ کے نزدیک کسی نامعلوم مقام پر دفن کیا گیا۔ اگرچہ انکے رشتہ داروں کو تدفین کیلئے جانے کی اجازت دی گئی تھی لیکن معلوم ہوا ہے کہ انکے تدفین کی جگہ پہنچنے سے قبل ہی لاشوں کو دفنایا گیا تھا۔