پانپور: لینڈ مافیا کے خلاف انتظامیہ کی کارروائی

زرعی زمین خصوصاً ’’آبی اول‘‘ کو تعمیراتی کاموں میں استعمال میں لائے جانے کی ممانعت کے باوجود وادی کشمیر میں زرعی زمین کی بھرائی کرکے اس پر عمارتیں تعمیر کرنے کا سلسلہ جاری ہے جس سے وادی میں زرعی زمین خصوصا ’’آبی اول‘‘ کا رقبہ سکڑتا جا رہا ہے۔

جنوبی کشمیر کے قصبہ پانپور میں لینڈ مافیا اور زرعی زمین کی بھرائی کرنے والے افراد کے خلاف تحصیل انتظامیہ نے کارروائی کرتے ہوئے زرعی زمین کی بھرائی کے ارادے سے انڈیلی گئی مٹی کو مشینری کے ذریعے واپس اٹھا کر سرکاری کاموں کے استعمال میں لایا جا رہا ہے۔

ضلع پلوامہ کے قصبہ پانپور میں پچھلے کئی دنوں سے غیرقانونی طور سرکاری اور زرعی اراضی کی بھرائی کرنے والوں کے خلاف مہم کو جاری رکھتے ہوئے تحصیلدر انتظامیہ نے منگل کو چندہارا، پانپور میں کارروائی کرتے ہوئے زرعی اور سرکاری اراضی پر مٹی انڈیلنے والے کئی افراد کو دھر لیا۔

تحصیلدار پانپور نے کہا کہ زرعی اراضی خصوصا ’’آبی اول‘‘ اور سرکاری زمین پر غیرقانونی طور بھرائی کرنے والے افراد کے خلاف سخت کارروائی عمل میں لائی جا رہی ہے۔

تحصیلدار پانپور کے مطابق تحصیل انتظامیہ کو یہ شکایات موصول ہو رہی تھیں کہ پانپور کے کئی علاقوں میں زرعی زمین سمیت آبی ذخائر میں غیر قانونی طور مٹی انڈیل کر نہ صرف زمین کی ہئیت تبدیل کرکے وہاں تعمیراتی ڈھانچے تعمیر کیے جا رہے ہیں بلکہ اراضی کو گراں قیمتوں پر فروخت بھی کیا جا رہا ہے۔

انہوں نے کہا کہ لینڈ مافیا کی جانب سے غیر قانونی طور پر مٹی لائی جا رہی ہے وہیں غیر قانونی طور زرعی اراضی کی بھرائی کا سلسلہ بھی جاری ہے، تاہم انکے مطابق اس قسم کی حرکات کو قطعا برداشت نہیں کیا جائے گا اور ایسے افراد کے خلاف قانونی کارروائی عمل میں لائی جائے گی۔

انہوں نے مستقبل میں بھی اس طرح کی کارروائی جاری رکھنے کے عزم کا اظہار کیا۔