ترال: قبرستان کے بیچوں بیچ سڑک کی مجوزہ تعمیر پر لوگوں کا احتجاج

ضلع پلوامہ کے ترال علاقے میں محکمہ تعمیرات عامہ کے خلاف احتجاج کرتے ہوئے خانہ گنڈ کے رہائشیوں نے مقامی قبرستان کے بیچوں بیچ سڑک کی تعمیر کو روکنے کا مطالبہ کیا ہے۔

جنوبی کشمیر کے سب ضلع ترال کے خانہ گنڈ علاقے میں لوگوں نے محکمہ تعمیرات عامہ کے خلاف احتجاج کیا۔

احتجاج کر رہے درجنوں مرد و زن نے مقامی قبرستان کے بیچوں بیچ سڑک کی مجوزہ تعمیر پر محکمہ تعمیرات عامہ کو شدید تنقید کا نشانہ بنایا۔

مقامی باشندوں نے الزام عائد کرتے ہوئے کہا کہ محکمہ تعمیرات عامہ کی جانب سے مقامی قبرستان کے بیچوں بیچ سڑک تعمیر کی جا رہی ہے جس سے مقامی لوگوں کے جذبات مجروح ہو جائیں گے۔

انہوں نے کہا کہ مقام قبرستان میں انکے آباء و اجداد دفن ہیں اور اس کے بیچوں بیچ سڑک سے کثیر آبادی کے مذہبی جذبات کو زک پہنچے گا۔

خانہ گنڈ کے لوگوں نے احتجاج کرتے ہوئے سڑک کو قبرستان کے کنارے تعمیر کیے جانے کا مطالبہ کیا۔