پلوامہ: فلٹریشن پلانٹ برسوں سے تکمیل کے منتظر، عوام کو گندا پانی سپلائی

پلوامہ کے مارول علاقے میں برسوں قبل فلٹریشن پلانٹ کی تعمیر کا کام شروع کیا گیا جو نامعلوم وجوہات کی بنا پر آج تک مکمل نہ ہو سکا۔

جنوبی کشمیر میں ضلع پلوامہ کے مارول علاقے کا فلٹریشن پلانٹ ناکارہ ہونے کے سبب مقامی آبادی کو دریاے جہلم سے بغیر فلٹر کیے ہوئے گندا پانی سپلائی کیا جا رہا ہے۔

مارول علاقے میں محکمہ جل شکتی نے کافی عرصہ قبل واٹر سپلائی سکیم کے تحت ایک فلٹریشن پلانٹ کا قیام عمل میں لایا لیکن طویل عرصہ گزرنے کے باوجود بھی اسکیم کو پایہ تکمیل تک نہیں پہنچایا گیا۔ جس کی وجہ سے مارول کی آبادی کو بغیر فلٹر پانی استعمال میں لانا پر رہا ہے۔

مقامی آبادی کا کہنا ہے کہ انہوں نے کئی بار ’’متعلقہ محکمہ اور انتظامیہ کی نوٹس میں یہ معاملہ لایا لیکن اس جانب توجہ نہیں دی گئی۔ گندا اور آلودہ پانی استعمال میں لانے سے علاقے میں وبائی بیماری پھوٹ پڑنے کا خدشہ لاحق رہتا ہے۔‘‘

اس حوالے سے مقامی لوگوں نے ضلع انتظامیہ سمیت محکمہ جل شکتی کے اعلیٰ افسران سے فلٹریشن پلانٹ کو جلد سے جلد مکمل کرانے کے احکامات صادر کرنے کی اپیل کی ہے۔