پلوامہ: محکمہ فوڈ سپلائی کی جانب سے چیکنگ ڈرائیو

مارکٹ چیکنگ ڈرائیو کے دوران غیر قانونی طور پر کام کرنے والے دکانداروں سے جرمانہ بھی وصول کیا گیا۔

رمضان المبارک کے مقدس مہینے کے پیش نظر عوام کو معیاری اور مقررہ قیمتوں پر اشیا خوردو نوش کی فراہمی کو یقینی بنانے کی غرض سے آج کھریو انتظامیہ نے شار شالی علاقے میں مارکٹ چیکنگ مہم چلائی۔

یہ مہم نائب تحصیلدار بشیر احمد اور تحصیل سپلائی افسر پرویز احمد کی سربراہی میں شار شالی کھریو علاقے کے مختلف بازاروں میں چلائی گئی جس کے تحت ٹیم نے غیر معیاری اشیاء فروخت کرنے والے دکانداروں یا بغیر ریٹ لسٹ کے اشیا خورد و نوش فروخت کرنے والوں پر جرمانہ عائد کیا جبکہ غیر معیاری اشیا کو موقع پر ہی ضائع کیا گیا۔

مارکٹ چیکنگ ڈرائیو کے دوران غیر قانونی طور پر کام کرنے والے دکانداروں سے جرمانہ بھی وصول کیا گیا۔ اس حوالے سے تحصیل سپلائی افسر پرویز احمد نے کہا کہ 'رمضان المبارک کے موقع پر گراں فروشی کا بازار گرم ہوتا ہے جس دوران دکاندار عام لوگوں کو لوٹتے ہیں۔ اسی وجہ سے ہم نے یہ مہم چلائی ہے'۔

انہوں نے کہا 'قیمتوں کو اعتدال میں رکھنے کے لیے ایسے اقدامات اُٹھانے کی سخت ضرورت ہے۔ اصولوں کی خلاف ورزی کرنے والے افراد کے خلاف قانونی کارروائی کی جائے گی'۔