ترال میں گرینیڈ حملے میں زخمی بزرگ کا انتقال

دو روز قبل ترال بس اسٹینڈ میں عسکریت پسندوں کی طرف سے پھینکے گئے گرینیڈ حملے میں زخمی بزرگ محمد عبداللہ گوجر ولد صادق گوجر ساکن حاجن ستورہ ترال اپنے گھر میں آج صبح انتقال کر گئے ہیں۔

فوت شدہ شخص کی عمر ستر برس بتائی جاتی ہے تاہم پولیس نے دعویٰ کیا کہ ہے کہ بزرگ شخص حملے میں معمولی زخمی ہوئے تھے اور وہ قدرتی موت مرے ہیں۔

اس ضمن میں ایس ایس پی اونتی پورہ طاہر سلیم نے ای ٹی وی بھارت کو بتایا کہ یہ بزرگ شہری گرینیڈ حملہ میں معمولی زخمی ہوئے تھے جس کے بعد انہیں مرہم پٹی کر کے ترال سب ڈسٹرکٹ اسپتال سے گھر روانہ کیا گیا اور ان کی حالت بالکل ٹھیک تھی تاہم آج صبح وہ قدرتی طور انتقال کر گئے ہیں۔

واضح رہے کہ کہ عسکریت پسندوں کی طرف سے ترال بس اسٹینڈ کے نزدیک دو روز قبل ایک آی ٹی بی پی گاڑی کو نشانہ بنانے کی غرض سے گرینیڈ پھینکا گیا تھا جس میں آٹھ عام شہری زخمی ہوگئے تھے۔