پانپور: تیندوے کی موجودگی سے لوگوں میں خوف

ضلع پلوامہ کے میج، پانپور علاقے میں تیندوے کی موجودگی کی اطلاع موصول ہوتے ہی محکمہ وائلڈ لائف کی ٹیم نے تیندوے کی تلاش شروع کردی ہے۔

ضلع پلوامہ کے قصبہ پانپور سے تین کلو میٹر کی دوری پر واقع میج گاوں کے لوگوں میں اُس وقت خوف و دہشت کا ماحول پھیل گیا جب علاقے کے کچھ لوگوں نے تیندوے کے بچوں کو علاقے میں گھومتے ہوئے دیکھا۔

مقامی لوگوں نے تیندے کے بچوں کو دیکھتے ہی فوری طور محکمہ وائلڈ لائف کو اطلاع دی جس کے بعد محکمہ کی ایک ٹیم نے میچ گائوں جا کر تیندوے کی تلاش شروع کر دی۔

اطلاعات کے مطابق وائلڈ لائف کی ٹیم نے تیندوے کے دو بچوں کو سفیدے کے ایک درخت پر دیکھا جس کے بعد انہیں پکڑنے کی کوشش کی گئی لیکن وہ وہاں سے بھاگنے میں کامیاب رہے۔

محکمہ وائلڈ لائف کی ٹیم کی جانب سے تیندوے کی تلاش میں سرعت لاتے ہوئے کئی متعدد مقامات پر پنجرے نصب کئے گئے۔

دریں اثناء، محکمہ وائلڈ لائف نے علاقے میں تیندوے کی موجودگی کے بعد مقامی لوگوں سے احتیاط برتنے کی اپیل کی ہے۔ انہوں نے عوام سے بچوں کو اکیلے گھروں سے باہر نہ بھیجنے کی بھی اپیل کی ہے۔