ضلع پلوامہ کے کوسی باغ اور اس سے ملحقہ دیہاتوں میں آبپاشی اسکیم ناکارہ ہونے کی وجہ سے کئی سو کنال اراضی بنجر زمین میں تبدیل ہو گئی ہے۔
ان علاقوں میں محمکہ اریگیشن کی جانب سے کھیتوں کی سنچائی کے لیے پانی سپلائی کیا جاتا تھا۔ تاہم آبپاشی اسکیم ناکارہ ہونے کی وجہ سے کھیتوں کو سنچائی کے لیے پانی فراہم نہیں کیا جارہا ہے اور نتیجہ میں دھان کی فصل کو نقصان پہنچنے کا خطرہ لاحق ہے۔
سنچائی کے لیے پانی نہ ہونے سے زمین بنجر، کسان پریشان ان دیہاتوں میں کسان موسم کے حساب سے فصل اگاتے ہیں اور اس فصل کو اگانے کے لیے درکار پانی آبپاشی اسکیم کے ذریعہ فراہم کیا جاتا تھا۔ لوگوں کا کہنا ہے کہ فصل خراب ہونے کی وجہ سے وہ فاقہ کشی کا شکار ہو جائیں گے۔
اس حوالے سے ایک مقامی محمد شعبان میر نے بتایا 'کوسی باغ اور اس کے ملحقہ دیہاتوں کو محکمہ ایریگیشن سے سنچائی کے لیے پانی سپلائی کیا جاتا ہے. اس اسکیم کو کئی روز قبل نقصان پہنچنے کی وجہ سے زمین بنجر ہو گئی اور فصل خراب ہو رہی ہے۔ ہم نے یہ معاملہ ضلع ترقیاتی کمشنر کہ نوٹس میں بھی لایا لیکن انہوں نے کوئی کارروائی نہیں کی'۔
انہوں نے ضلع انتظامیہ سے اپیل کی کہ وہ ان دیہاتوں میں پانی کی سپلائی کو جلدی یقینی بنائیں تاکہ ان کی محنت اور پیسہ ڈوب نہ جائے.
ای ٹی وی بھارت کے نمائندے نے جب یہ معاملہ محکمہ ایریگیشن کے ایکس ای این ہرپندر سنگھ کی نوٹس میں لایا تو انہوں نے کہا کہ پانچ دنوں کے اندر اندر ملحقہ دیہاتوں کو سنچائی کے لئے پانی سپلائی کیا جائے گا۔
