منشیات کے خلاف ترال میں ریلی

منشیات کی لت سے نوجوانوں کو دور رکھنے اور عوام میں بیداری پیدا کرنے کی غرض سے ہفتہ کو جنوبی کشمیر کے قصبہ ترال میں ایک ریلی اور سیمنار کا انعقاد کیا گیا۔

جموں و کشمیر پولیس کی جانب سے ہفتہ کو گورنمنٹ ڈگری کالج ترال کے سیمنار ہال میں منشیات سے متعلق عوامی بیداری اور نوجوانوں کو اس لت سے دور رکھنے کے لیے ایک سیمنار منعقد کیا گیا۔

سیمنار میں منشیات کی وبا کو قابو کرنے کے لیے ماہرین نے مقالات پڑھنے کے ساتھ ساتھ اپنے تجربات اور مشاہدات بیان کیے۔ اسکے علاوہ منشیات کے پھیلاؤ اور اسکے تدارک کے لیے ماہرین نے اپنی اپنی تجاویز سامنے رکھیں۔

بعد ازاں ڈگری کالج کے طلباء نے بس اسٹینڈ ترال سے ایک ریلی برآمد کی جس دوران طلباء نے ہاتھوں میں بینر اور پلے کارڈ اٹھا رکھے تھے جن پر منشیات کی وبا کے منفی اثرات کے متعلق نعرے درج تھے۔

اس موقع پر ڈگری کالج ترال کے پر نسپل ڈاکٹر بی اے میر، ایس ڈی پی او ترال ڈاکٹر اعجاز ملک، ایس ایچ او ترال جی ایم راتھر کے علاوہ سماجی کارکنان بھی موجود تھے۔

میڈیاسے گفتگو کرتے ہوئے ایس ڈی پی او ترال نے بتایا کہ منشیات کی وبا پر قابو پانے اور اس بدعت کا قلع قمع کرنے کے لیے پولیس نے اس ریلی اور سیمنار کا انعقاد کیا۔ انہوں نے آئندہ بھی مہم جاری رکھے جانے کے عزم کا اظہار کیا۔

انہوں نے نوجونوں کو منشیات سے دور رہنے اور پڑھائی لکھائی کے ساتھ ساتھ کھیل کود کی سرگرمیوں میں شرکت کرنے کی بھی تلقین کی۔