ہماری پارٹی چٹان کی طرح مضبوطـ: پی ڈی پی ترجمان

’’پی ڈی پی خوش قسمت جماعت ہے کہ ہمارے ورکر آج بھی ہمارے ساتھ ہیں اور اس لحاظ سے پی ڈی پی چٹان کی طرح کھڑی ہے اور ہمیں امید ہے کہ آینده انتخابات میں لوگ اس پارٹی کا بھر پور ساتھ دیں گے۔‘‘

انتخابات سے قبل سیاسی لیڈروں کے ایک پارٹی چھوڑ کر دوسری جماعت میں شمولیت اختیار کرنے کو ’’ذاتی مجبوری‘‘ قرار دیتے ہوئے پیپلز ڈیموکریٹک پارٹی (پی ڈی پی) کے ترجمان ڈاکٹر ہربخش سنگھ نے بتایاکہ ’’پی ڈی پی تمام مشکلات کے باوجود مضبوط چٹان کی طرح قائم ہے۔‘‘

ان باتوں کا اظہار پی ڈی پی ترجمان نے جنوبی کشمیر کے قصبہ ترال میں ایک تقریب کے حاشیے پر نامہ نگاروں سے بات کرتے ہوئے کیا۔

ڈاکٹر ہر بخش سنگھ نے بتایا کہ ’’سیاسی لیڈروں کا پارٹیاں بدلنا معمول کی بات ہے، ایسا ہوتا رہتا ہے کہ وہ کھبی بھی ذاتی مجبوری کی وجہ سے سیاسی وفاداری بدل سکتے ہیں؛ کسی کی گردن انکم ٹیکس ڈیپارٹمنٹ میں پھنسی ہے تو کسی کو ذاتی محافظ (پی ایس او) درکار ہوتے ہیں بعض افراد منڈیٹ نہ ملنے یا ان بن ہونے کی وجہ سے پارٹی سے دوری اختیار کر لیتے ہیں۔‘‘

انہوں نے پی ڈی پی سے علیحدگی اختیار کرنے کے عمل کو فطری قرار دیتے ہوئے دعویٰ کیا کہ ’’پارٹی کا اصل اثاثہ وکرز ہوتے ہیں، اور پی ڈی پی اس لحاظ سے خوش قسمت جماعت ہے۔‘‘

سنگھ نے مزید کہا کہ ’’پی ڈی خوش قسمت جماعت ہے کہ ہمارے ورکر آج بھی ہمارے ساتھ ہیں اور اس لحاظ سے پی ڈی پی قد آور چٹان کی طرح کھڑی ہے اور ہمیں امید ہے کہ آینده انتخابات میں لوگ اس پارٹی کا بھر پور ساتھ دیں گے۔‘‘

واضح رہے کہ گزشتہ دنوں پی ڈی پی سے کئی لیڈران علیحدگی اختیار کر چکے ہیں وہیں دو روز قبل نیشنل کانفرنس کے سینئر لیڈر دیوندر رانا نے این سی کو الوداع کہہ کر بی جے پی میں شامل ہو گئے تھے۔