ترال: سڑک معاملے کو لیکر صوفی گنڈ کے لوگوں کا احتجاج

صوفی گنڈ ترال میں زیارت گاہ تک زیر تعمیر سڑک معاملے کو لیکر سینکڑوں لوگوں نے احتجاج کیا۔

صوفی گنڈ ترال میں زیارت گاہ تک زیر تعمیر سڑک کا معاملہ دو دیہات میں نزاع کا باعث بنتا جا رہا ہے، کیونکہ آج صوفی گنڈ کے سینکڑوں لوگوں نے احتجاج کیا اور الزام عائد کیا کہ مقامی گاؤں خانہ گنڈ کے لوگوں نے سڑک کے معاملے پر ناراض ہو کر گزشتہ شام ان کے سیب کے باغات تہیہ تیغ کیے اور مقامی زیارت گاہ کو نقصان پہنچانے کی کوشش کی گئی۔

انہوں نے مطالبہ کیا کہ نقصانات کا تخمینہ لگا کر ان کو امداد فراہم کی جائے اور ملوث افراد کے خلاف قانونی کارروائی کی جائے۔

واضح رہے کہ ڈار سے صوفی گنڈ زیارت تک رابطہ سڑک کی تعمیر کا کام فی الحال رکا ہوا ہے اور بنم گنڈ، خانہ گنڈ کے لوگ دعویٰ کر رہے تھے کہ سڑک سے ان کے قبرستان کو نقصان ہو رہا ہے۔

اس دوران ایڈیشنل ڈپٹی کمشنر ترال شبیر احمد رینہ نے میڈیا کو بتایا کہ معاملے کی نسبت عدالتی تحقیقات کے احکامات صادر کیے ہیں۔