DDC Member Aripal Leaves PDP ڈی ڈی سی ممبر آری پل منظور گنائی پی ڈی پی سی مستعفی

ڈی ڈی سی ممبر ترال آری پل منظور احمد گنائی نے پی ڈی پی سے استعفی دیا ہے۔ قیاس آرائی کی جارہی ہے کہ منظور گنائی بی جے پی یا اپنی پارٹی میں شامل ہوں گے۔

ترال:سب ضلع ترال میں آج پی ڈی پی کو اس وقت ایک جھٹکا لگا جب پارٹی کے ایک سینئر لیڈر اور ڈی ڈی سی ممبر آری پل منظور احمد گنائی نے پارٹی کو خیرباد کہا، اگرچہ فوری طور یہ معلوم نہیں ہو سکا کہ پی ڈی پی کو خیرباد کہنے کے پیچھے کیا وجوہات رہی، تاہم امکان ظاہر کیا جا رہا ہے کہ موصوف آنے والے وقت میں بھاجپا یا الطاف بخاری والی اپنی پارٹی میں شامل ہو سکتے ہیں۔

اس دوران ای ٹی وی بھارت کے نمائندے شبیر بٹ کے ساتھ فون پر بات کرتے ہوئے منظور احمد گنائی نے بتایا کہ موجودہ صورتحال میں حالات کا جو تقاضا تھا اسی لیے انہوں نے پی ڈی پی کو چھوڑ دیا ہے۔ یہ پوچھے جانے پر کہ پی ڈی پی نے آپ کو ایک شناخت دی، منظور گنائی نے بتایا کہ کوئی پارٹی کسی کو شناخت نہیں دیتی ہے بلکہ عوام ہی طاقت کا سرچشمہ ہے اور عوام کے ساتھ مشاورت کے بعد ہی انہوں نے یہ فیصلہ لیا ہے۔

منظور گنائی نے مستقبل کے لائحہ عمل کے بارے میں بتایا کہ اپنے ووٹروں کے ساتھ مشاورت کے بعد ہی وہ کوئی فیصلہ لیں گے۔ انہوں نے دعویٰ کیا کہ اپنے علاقے کی مجموعی ترقی کے لیے وہ کام کرتے رہیں گے اور اس ضمن میں کسی بھی دقیقه فروگزاشت نہیں کرے گا۔واضح رہے کہ منظور گنائی نے پی ڈی پی کی ٹکٹ پر ہی آری پل بلاک سے،الیکشن لڑکر جیت درج کی تھی اور ایسا مانا جا رہا ہے کہ منظور کا پارٹی سے استعفی پی ڈی پی کے لیے ایک بڑا جھٹکا قرار دیا جا رہا ہے۔