پانپور: ٹریفک قوانین کی خلاف ورزی کرنے والوں کے خلاف کارروائی

ٹریفک قوانین کی خلاف ورزی کرنے والوں کے خلاف کارروائی کرتے ہوئے پولیس نے کئی ڈرائیوروں پر جرمانہ عائد کیا۔

ضلع پلوامہ کے پانپور قصبہ میں پولیس نے کدلہ چوک میں ٹریفک قوانین کی خلاف ورزی کرنے والوں کے خلاف کارروائی کرتے ہوئے ایم وی ایکٹ کے تحت کئی ڈرائیوروں پر جرمانہ عائد کیا۔

پولیس اسٹیشن پانپور نے ٹریفک قوانین کی خلاف ورزی کرنے والوں کے خلاف ایک خصوصی مہم شروع کی ہے۔ بغیر لائسنس یا ہیلمٹ موٹرسائیکل چلانے والوں اور دیگر ضروری دستاویز کے بغیر گاڑی چلانے والوں کے خلاف کارروائی عمل میں لائی جا رہی ہے۔

اس ضمن میں پانپور پولیس نے عوام سے ٹریفک قوانین کی سختی سے پابندی کرنے کی اپیل کی ہے۔ پانپور پولیس کے مطابق ٹریفک قوانین کی خلاف ورزی کرنے والوں کے خلاف سختی سے نمٹا جائے گا۔

وہیں، پولیس نے قصبہ پانپور میں ٹریفک کی نقل و حمل کو استوار بنانے اور ٹریفک قوانین کی پاسداری کرنے کے لیے عوام سے تعاون طلب کیا ہے۔