اشیائے خوردنی کی قیمتوں میں بے تحاشہ اضافہ کی شکایات موصول ہونے کے بعد ضلع پلوامہ میں انتظامیہ نے پیر کو ضلع کے مختلف بازاروں کا معائنہ کیا۔
ٹیم نے غیر معیاری اشیاء فروخت کرنے والے دکانداروں یا بغیر ریٹ لسٹ کے اشیاء خورد و نوش فروخت کرنے والوں پر جرمانہ عائد کیا۔
مارکیٹ چیکنگ ڈرائیو کے دوران 18500روپے بطور جرمانہ وصول کیا گیا وہیں قصبہ میں خوانچہ فروشوں کے خلاف کارروائی کرتے ہوئے انہیں مارکیٹ سے ہٹایا گیا۔
اس حوالے سے تحصیلدار پلوامہ نے کہا کہ ’’رمضان مبارک کے موقع پر گراں فروشی کا بازار گرم ہوتا ہے جس کے پیش نظر آج ہم نے مختلف محکموں کے ہمراہ مارکیٹ چیکنگ ڈرائیور شروع کی جسے آگے بھی جاری رکھا جائے گے۔‘‘
انہوں نے دکانداروں کو گراں فروشی، ذخیرہ اندوزی اور غیر معیاری یا زائد المیعاد اشیاء فروخت کرنے سے باز رہنے کی تلقین کرتے ہوئے کہا: ’’خلاف ورزی کرنے والے افراد کے خلاف قانونی کارروائی انجام دی جائے گی۔‘‘
