Kisan Sampark Abhiyan Awareness Programme: پلوامہ میں کسانوں کے لیے بیداری کیمپ منعقد

ضلع پلوامہ میں ’’کسان سمپرک ابھیان، جموں وکشمیر‘‘ کے تحت 11 بلاکس میں جانکاری پروگرام کا انعقاد کیا گیا جن میں کسانوں، آفیشلز سمیت پی آر آئی ممبران نے بھی شرکت کی۔

پلوامہ (جموں و کشمیر):کسانوں کی آمدن میں اضافہ، سائنسی تحقیق سے باخبر کرنے اور کسانوں کے لیے وضع کی سرکاری اسکیموں سے باخبر کرنے کے حوالے سے جموں و کشمیر کے طول و ارض میں معلوماتی اور تربیتی کیمپس منعقد کیے جا رہے ہیں۔ جنوبی کشمیر کے ضلع پلوامہ کے11 مختلف بلاکس میں ’’کسان سمپرک ابھیان‘‘ کے تحت کسانوں کے لئے منعقد کیے گئے جانکاری پروگرام میں مختلف محکمہ جات سے تعلق رکھنے والے افسران سمیت مختلف علاقوں سے آئے کسانوں اور پی آر آئی ممبران نے شرکت کی۔

پروگرام کا انعقاد ضلع انتظامیہ نے محکمہ زراعت، باغبانی اور زرعی شعبہ سے وابستہ مختلف محکموں کی جانب سے وضع کی گئی اسکیموں کے بارے میں کسانوں کو جانکاری فراہم کرنے کی غرض سے کیا گیا تھا۔ پروگرام کے دوران متعلقہ محکموں کی جانب سے چلائی جانے والے اسکیموں سے متعلق ایک ویڈیو پریذنٹیشن کے ذریعہ کسانوں کو تربیت فراہم کی گئی جس پر کسانوں نے اطمینان کا اظہار کیا۔

آگاہی پروگرامز کا انعقاد ضلع کے مختلف پنچایت گھروں میں کیا گیا تھا جن میں مقامی پنچ، سرپنچ صاحبان نے بھی شرکت کی۔ منتظمین کا کہنا ہے کہ ’’یہ پروگرام دیہی معیشت کو تبدیل کرنے اور کسانوں کی آمدن کو دوگنا کرنے کی صلاحیت رکھتا ہے۔‘‘ اس ضمن میں وائس چیئرمین، بی ڈی سی، پلوامہ سرور حسین نے میڈیا نمائندوں کو بتایا کہ ’’اس طرح کے پروگرامز منعقد کرنے سے کسانوں کو کافی فائدہ ہوگا، ساتھ ہی ان کی آمدنی میں بھی اضافہ ہوگا۔‘‘

انہوں نے مزید کہا ’’اس پروگرام کے دوران کسانوں کو محکمہ زراعت کی جانب سے وضع کی گئی اسکیموں کی نہ صرف جانکاری فراہم کی گئی بلکہ کسانوں کو ان اسکیموں سے مستفید ہونے کے تربیت بھی فراہم کی گئی۔‘‘ منتظمین نے کسانوں سے ان اسکیموں کا بھرپور فائدہ اٹھائے جانے کی بھی اپیل کی۔