پلوامہ کار بم دھماکے کو ناکارہ بنانے کے ایک دن بعد پولیس نے اس معاملے کی تحقیقات کے دوران جنوبی کشمیر کے ضلع شوپیاں سے تعلق رکھنے والے حزب تنظیم سے وابستہ سرگرم عسکریت پسند ہدایت اللہ ملک کے بھائی سمیر احمد ملک کو پوچھ تاچھ کے لیے حراست میں لیا ہے۔
پولیس ذرائع کا کہنا ہے کہ جمعہ کو پولیس ٹیم ہدایت اللہ کے آبائی گھر شرتپورہ شوپیاں میں چھاپہ مارا جس دوران اسکے بھائی کو حراست کر لیا گیا ہے۔
ہدایت اللہ گزشتہ سال حزب المجاہدین تنظیم میں شامل ہوئے تھے۔
کئی میڈیا رپورٹس کے مطابق گزشتہ کل ناکارہ کیے گئے بارودی مواد میں ہدایت اللہ کی کار استعمال ہوئی ہے جس کی پولیس پوچھ تاچھ کر رہی ہے۔
دریں اثناء استعمال ہونے والی اس گاڑی کا نمبر پلیٹ کٹھوعہ کے ایک شہری کی موٹر بائیک کا ہے جس کے مالک ساہل کمار کو کٹھوعہ پولیس نے پوچھ تاچھ کے لیے بلایا ہے۔
قابل ذکر ہے کہ جمعرات کو سیکورٹی فورسز نے ضلع پلوامہ کے ایون گنڈ علاقے میں ایک کار میں آئی ای ڈی مواد برآمد کرکے اسے ناکارہ بنا دیا تھا۔ پولیس کے مطابق اس کار بم دھماکے کا استعمال گزشتہ برس لیتپورہ میں ہوئے خود کش حملے کی طرز پر کیا جانے والا تھا جسے حفاظتی اہلکاروں کی چوکسی نے ناکام بنا دیا۔
یاد رہے کہ گزشتہ برس لیتپورہ پلوامہ میں سرینگر - جموں شاہراہ پر سی آر پی ایف کی کانوائی پر خود کش حملے میں 40سے زائد اہلکار ہلاک ہوئے تھے۔ اس حملے کے بعد بھارت - پاکستان تعلقات میں مزید کشیدگی پیدا ہوئی تھی۔
